काठमाडौं । सरकारले प्रहरी महानिरीक्षकको सरुवालाई कारबाही नभई जिम्मेवारीको परिवर्तन मात्र भएको बताएको छ । मन्त्रिपरिषद्को बैठकपछि सरकारका प्रवक्ता सस्मित पोखरेलले उक्त स्पष्टीकरण दिएका हुन् ।
आज बसेको मन्त्रिपरिषद् बैठकले प्रहरी अतिरिक्त महानिरीक्षक डा. मनोज कुमार केसीलाई प्रहरी महानिरीक्षकमा बढुवा गर्ने र दानबहादुर कार्कीलाई प्रधानमन्त्रीको विशेष सुरक्षा सल्लाहकारमा खटाउने निर्णय गरेको थियो । केसीको बढुवा आजै २०८३ कात्तिक १८ गतेदेखि लागू हुने गरी गरिएको छ ।
प्रवक्ता पोखरेलले प्रधानमन्त्री तथा मन्त्रिपरिषद्को कार्यालयमा प्रहरी महानिरीक्षकस्तरको विशेष सुरक्षा सल्लाहकार पद सिर्जना गरिएको जानकारी दिए । उक्त पदमा कार्कीलाई खटाइएको उनले बताए ।
पत्रकारहरूले कार्कीमाथि कारबाही गर्नुपर्नाको कारणबारे प्रश्न गरेका थिए । जवाफमा पोखरेलले कारबाहीको रूपमा नभई जिम्मेवारी फेरबदल मात्र गरिएको बताए । कार्कीलाई सुरक्षा सल्लाहकारका रूपमा प्रधानमन्त्री कार्यालयमा ल्याइएको र नयाँ प्रहरी महानिरीक्षकले आवश्यक काम अघि बढाउने उनको भनाइ थियो ।
केसीको बढुवा प्रहरी नियमावली, २०७१ को नियम ४१ बमोजिम गरिएको हो । मुलुकको शान्ति सुरक्षाको व्यवस्था सुदृढ बनाउन प्रधानमन्त्रीलाई सुरक्षासम्बन्धी सल्लाह, सुझाव र परामर्श दिने उद्देश्यले सल्लाहकार पद सिर्जना गरिएको सरकारले जनाएको छ ।
