खोटाङको जयरामघाटदेखि हलेसीसम्मको सडक अब मर्मत हुने भएको छ। मध्यपहाडी लोकमार्गको यो ३५ किलोमिटर खण्डमा कालोपत्र उप्किएर खाल्डाखुल्डी परेको १६ वर्ष बितिसकेको छ। सडक मर्मतका लागि सात करोड २१ लाख रुपैयाँको ठेक्का सम्झौता भइसकेको छ।
पुष्पलाल राजमार्ग योजना कार्यालय रामेछापका अनुसार कात्तिक १६ गते सिन्धुपाल्चोकको एसआरबी बिल्डर्ससँग सम्झौता भएको हो। कम्पनीले तिहार सकिएलगत्तै काम थाल्ने तयारी गरेको छ। मर्मत सम्पन्न गर्ने लक्ष्य आगामी जेठ मसान्तसम्म राखिएको छ।
यो सडक विसं २०६७ मा ओटासिल प्रविधिबाट कालोपत्र गरिएको थियो। तर केही वर्षमै कालोपत्र उप्किन थालेपछि यात्रा जोखिमपूर्ण बन्दै गयो। दूधकोशीस्थित जयरामघाटबाट त्रिधार्मिकस्थल हलेसीसम्म पुग्ने यो मार्ग खोटाङका १० स्थानीय तह र छिमेकी भोजपुरका सवारीसाधनले प्रयोग गर्छन्। दैनिक सयौँ सवारी ओहोरदोहोर गर्छन्।
हिन्दु, बौद्ध र किरात धर्मावलम्बीको आस्थाको केन्द्र हलेसी पुग्ने दर्शनार्थी पनि यही बाटो हिँड्छन्। वर्षामा खाल्डामा पानी जम्ने र हिउँदमा धुलो उड्ने समस्या रहेको स्थानीयले बताएका छन्।
योजना कार्यालयका सूचना अधिकारी भरत श्रेष्ठका अनुसार खाल्डाखुल्डी पुर्ने र जीर्ण भाग पुनःनिर्माण गरिनेछ। तर सडकको चौडाइ भने करিব पाँच मिटर मात्रै छ, जबकि मध्यपहाडी लोकमार्गका अन्य खण्ड कम्तीमा नौ मिटर चौडा छन्। हलेसी तुवाचुङ नगरपालिकाका प्रमुख बिमला राईले सडकलाई लोकमार्गको मापदण्डअनुसार स्तरोन्नति गर्न र सडक विभागलाई जिम्मेवारी दिन निरन्तर माग गर्दै आएको बताएकी छन्।
यसैबीच हलेसीदेखि दिक्तेलबजारसम्मको ४२ किलोमिटर सडक भने एसियाली विकास बैङ्कको सहयोगमा कालोपत्र भइसकेको छ।
