चितवन । राष्ट्रिय स्वतन्त्र पार्टी (रास्वपा) का सभापति रवि लामिछानेले नेपाल प्रहरीको महानिरीक्षक परिवर्तन गर्ने निर्णयको कारण सरकारले नै स्पष्ट पार्नुपर्ने बताएका छन् । सुरक्षा निकायको नेतृत्व फेरबदल संवेदनशील विषय भएकाले त्यसको आवश्यकता र औचित्य सरकारले खुलाउनुपर्ने उनको भनाइ छ ।
बिहीबार चितवनमा सञ्चारकर्मीसँग कुरा गर्दै सभापति लामिछानेले सरकारका हरेक निर्णयमा पार्टीले आँखा चिम्लेर समर्थन नगर्ने बताए । सरकारका काममाथि प्रश्न उठाउने, थप स्पष्टता खोज्ने र सन्तुलन कायम राख्ने जिम्मेवारी पार्टीको भएको उनले बताए ।
‘सरकारले काम गर्नका लागि आवश्यक कदम चाल्दा त्यसको औचित्य पुष्टि गर्ने जिम्मेवारी सरकारकै रहन्छ,’ उनले भने, ‘सुरक्षा निकायसँग सम्बन्धित जिम्मेवारी हेरफेर अत्यन्तै संवेदनशील विषय हो, त्यसैले सरकारले निश्चित समयमा यसको औचित्य अवश्य पुष्टि गर्ला ।’
पार्टीले सरकारलाई प्रहरी महानिरीक्षक, नायब महानिरीक्षक, प्रहरी निरीक्षक वा प्रमुख जिल्ला अधिकारी फेर्न निर्देशन नदिने उनले स्पष्ट पारे । आइजिपी परिवर्तनलाई लिएर पार्टी असन्तुष्ट नरहेको पनि उनको भनाइ छ ।
सरकारले बुधबारको मन्त्रिपरिषद् बैठकबाट तत्कालीन प्रहरी महानिरीक्षक दानबहादुर कार्कीलाई प्रधानमन्त्री बालेन शाहको विशेष सुरक्षा सल्लाहकारमा खटाउने र रिक्त हुने महानिरीक्षक पदमा प्रहरी अतिरिक्त महानिरीक्षक डा. मनोजकुमार केसीलाई बढुवा गर्ने निर्णय गरेको थियो । केसीको नियुक्ति कात्तिक १८ गतेदेखि लागू भएको छ ।
सरकारका प्रवक्ता तथा शिक्षा तथा खेलकुदमन्त्री सस्मित पोखरेलले कार्कीमाथि कुनै कारबाही नभएको र केवल जिम्मेवारी फेरबदल गरिएको बताएका छन् । रास्वपा प्रवक्ता जगदीश खरेलले भने पार्टीले कसैलाई हटाउन निर्देशन नदिएको स्पष्ट पारेका छन् ।
