चितवन । राष्ट्रिय स्वतन्त्र पार्टी (रास्वपा) का सभापति रवि लामिछानेले व्यक्तिभन्दा नीति देशभर पुग्नुपर्ने बताएका छन् । आफ्नो निर्वाचन क्षेत्रमा जनप्रतिनिधिभन्दा नीतिगत काम महत्त्वपूर्ण हुने उनको भनाइ छ ।
बिहीबार भरतपुर विमानस्थलमा पत्रकारसँग कुरा गर्दै सभापति लामिछानेले आफू चितवन ढिला आए पनि यहाँ नीतिगत काम भइरहेको बताए । ‘जिम्मेवारी धेरै छ । तर व्यक्तिभन्दा प्रणाली आउनुपर्छ भन्ने सोचका कारण व्यक्तिका रूपमा म ढिला आए पनि सरकार र पार्टीका नीतिहरू देशभर पुगिरहेका छन्,’ उनले भने, ‘हाम्रो उद्देश्य पनि त्यही हो । व्यक्ति आउनुभन्दा नीति आउनु पर्यो ।’
चितवन क्षेत्र नम्बर २ का प्रतिनिधिसभा सदस्यसमेत रहेका सभापति लामिछाने शुक्रबारसम्म चितवनका विभिन्न कार्यक्रममा सहभागी हुन आज यहाँ आएका हुन् । रास्वपा चितवनका सभापति इन्जिनियर मिनिमाधव खनालका अनुसार चितवन आएलगत्तै सभापति लामिछानेले आज पार्टी कार्यालयमा जिल्ला, क्षेत्र र स्थानीय तहका पदाधिकारीसँग सङ्गठनात्मक छलफल गर्नेछन् ।
सभापति लामिछानेले शुक्रबार बिहान नारायणी नदी किनारको कटान क्षेत्रको अवलोकन तथा सम्बन्धित पक्षसँग छलफल गर्ने कार्यक्रम रहेको छ ।
