भोटेकोशी बाढीको उद्धार कार्यमा खटिएको नेपाल प्रहरीको कुकुर लियो देशभरका प्रहरी केनाइनमध्ये सर्वोत्कृष्ट घोषित भएको छ। तिहारको दोस्रो दिन कुकुर तिहारको अवसरमा नेपाल प्रहरी केनाइन कार्यालयमा आयोजित कार्यक्रममा लियोलाई पदक प्रदान गरिएको थियो।
अपराध अनुसन्धान विभागका प्रहरी नायब महानिरीक्षक ओम रानाले लियोलाई पदक प्रदान गरे। गत १० भदौमा आएको भोटेकोशी बाढीपछि लियो करिब एक महिनासम्म खोज तथा उद्धार कार्यमा खटिएको थियो।
उद्धारका क्रममा लियोले केही व्यक्तिका शव फेला पारेको थियो भने शरीरका टुक्राहरू समेत फेला पार्न सफल भएको थियो। ल्याब्रोडर जातको यो कुकुरले २०७८ सालदेखि प्रहरीको खोज तथा उद्धार कार्यमा सहयोग गर्दै आएको छ।
कुकुर तिहारमा कुकुरलाई सम्मान गर्ने परम्पराअनुसार आयोजित कार्यक्रममा लियोको योगदानको विशेष चर्चा गरिएको थियो। विपद्का बेला मानिसको जीवन रक्षामा कुकुरको भूमिका कति महत्वपूर्ण हुन्छ भन्ने यो उदाहरणले देखाएको छ।
