स्पेनी फुटबलको सबैभन्दा बहुप्रतिक्षित भिडन्त एल क्लासिको आज राति हुँदैछ। बार्सिलोनाको घरेलु मैदान क्याम्प नोउमा हुने खेल नेपाली समयअनुसार राति १ बजेर ४५ मिनेटदेखि सुरु हुनेछ।
जारी सिजनमा बार्सिलोनाले आफ्ना सबै नौ वटा लिग खेलमा जित हासिल गर्दै २७ अंक जोडेको छ र अंक तालिकाको शीर्ष स्थानमा छ। समान खेलबाट ६ अंक कम ल्याएको रियल मड्रिड तेस्रो स्थानमा छ। बार्सिलोनाले यो खेल जितेमा दुई टिमबीचको अंक दूरी ९ पुग्नेछ भने रियल विजयी भएमा अन्तर ३ अंकमा झर्नेछ। त्यसैले आजको नतिजाले उपाधि दौडको दिशा निर्धारण गर्नेछ।
पछिल्ला सात एल क्लासिकोमध्ये छ वटामा रियलले हार व्यहोरेको छ। त्यसैले अंक दूरी घटाउन र इज्जत जोगाउन पनि रियललाई आजको खेलमा जित्नुपर्ने मानसिक दबाब छ। लन्डनमा हुन गइरहेको बालोन डी’ओर अवार्ड समारोहको पूर्वसन्ध्यामा हुन लागेको यो खेलमा सबैको ध्यान बार्सिलोनाका लामिन यामाल र रियलका किलियन एम्बाप्पेको प्रदर्शनमा केन्द्रित हुनेछ।
यामालले जारी सिजनमा ९ खेलमा ८ गोल र ६ असिस्ट गरिसकेका छन् भने एम्बाप्पेले पनि समान खेलमा ९ गोल र २ असिस्ट जोडेका छन्। दुवै खेलाडी बालोन डी’ओरका दाबेदार समेत हुन्, जसले आजको भिडन्तलाई थप रोमाञ्चक बनाएको छ।
