तिहार नजिकिँदै गर्दा फूलको अग्रिम माग आउन थालेपछि कञ्चनपुरका पुष्प व्यवसायीमा खुसी छाएको छ। विगतका वर्षमा बजार नपाएर बारीमै फूल कुहिनुपरेको पीडा भोगेका किसानले यस वर्ष चाडपर्वअघि नै बुकिङ आउन थालेपछि राहत महसुस गरेका छन्।
भीमदत्त नगरपालिका–१ की सिर्जना जोशी सात वर्षदेखि पुष्प व्यवसायमा छिन्। उनले सुरुमा तीन सय बोटबाट खेती थालेकी थिइन् र अहिले वार्षिक ३० हजार रुपैयाँ भाडा तिरेर १५ कट्ठा जग्गामा फूलखेती गरिरहेकी छिन्। यस वर्ष तिहारअघि नै २० किलो फूलको अग्रिम बुकिङ भइसकेको उनले बताइन्।
जोशीका अनुसार दुई वर्षअघिसम्म बजार नपाउँदा उत्पादन खेर जान्थ्यो। दोस्रो वर्ष लगाएका एक हजार बोट कुहिए भने अर्को वर्ष चार हजार बोट काठमाडौँ पठाउँदा बाटोमै कुहियो। गत वर्ष भने फूलले राम्रो बजार पायो र खर्च कटाएर डेढ लाख रुपैयाँ आम्दानी भयो, त्यसपछि उनले खेती बढाएकी हुन्।
प्लास्टिकका मालामा रोक र भारतबाट आउने फूलमा रोक लागेपछि स्थानीय फूलले बजार पाएको जोशीको भनाइ छ। यसपटक उनले चार क्विन्टल फूल बिक्री गर्ने लक्ष्य राखेकी छिन् र फूल प्रतिकिलो ५०० रुपैयाँमा बिक्री भइरहेको छ। परम्परागत खेतीको तुलनामा फूलखेतीबाट तीन गुणा बढी आम्दानी हुने उनको भनाइ छ।
भीमदत्त नगरपालिका–१५ का मेघा रावलले आफ्नै चार कट्ठा जग्गामा दुई हजार ४०० बोट फूल लगाएका छन्। उनले २५ हजार रुपैयाँ लागत लागेको र तिहारमा फूल बिक्रीबाट एक लाख रुपैयाँसम्म आम्दानी हुने अपेक्षा गरेको बताए।
