बझाङ । बझाङको केदारस्युँ गाउँपालिका–९, सेकुमा बाटो हिँडिरहेकी एक ८४ वर्षीया महिला भिरबाट खसेर रुखको जरामा अड्किएको अवस्थामा सकुशल उद्धार गरिएको छ।
बुधबार दिउँसो करिब १२ बजेर ५० मिनेट जाँदा सेकुकी रत्ना बिष्ट बाटोमा हिँड्ने क्रममा करिब पाँच मिटर तल भिरमा खसेकी थिइन्। खस्ने क्रममा उनी रुखको जरामा अड्किएकी थिइन्, जसले गर्दा उनी अझ तल खस्नबाट जोगिएकी थिइन्।
घटनाको जानकारी पाएलगत्तै अस्थायी प्रहरी पोस्ट झोताबाट चार जनाको प्रहरी टोली घटनास्थल पुगेको थियो। प्रहरी टोली र स्थानीय बासिन्दाको संयुक्त प्रयासमा दिउँसो करिब १ बजेर २० मिनेट जाँदा उनको उद्धार भएको हो।
उद्धारपछि उनलाई सुरक्षित रूपमा आफन्तको जिम्मा लगाइएको छ। उनी सकुशल रहेको जनाइएको छ।
