जनकपुरधाम — मधेश प्रदेशको सत्ता समीकरण बदलिन लागेपछि नेपाली कम्युनिस्ट पार्टी (नेकपा) सरकारबाट बाहिरिने भएको छ। पार्टीको संसदीय दलले केहीबेरअघि बसेको भर्चुअल बैठकमा सरकार छाड्ने निर्णय गरेको एक सांसदले जानकारी दिएका छन्।
बैठक अध्यक्ष पुष्पकमल दाहाल ‘प्रचण्ड’ को निर्देशनपछि बसेको बताइएको छ। निर्णयसँगै प्रदेश सरकारमा रहेका नेकपाका चार मन्त्रीले केहीबेरमै राजीनामा पत्र बुझाउने तयारी गरेका छन्।
राजीनामा दिन लागेका मन्त्रीमा अर्थमन्त्री तथा संसदीय दलका नेता युवराज भट्टराई, उद्योग तथा पर्यटनमन्त्री कनिष पटेल, गृह, सञ्चार तथा कानुनमन्त्री फकिरा महतो र ऊर्जा, सिँचाइ तथा खानेपानीमन्त्री जवाहर कुशवाहा छन्।
गत असोज ३० गते नेकपा एमाले सरकारबाट बाहिरिएपछि मधेश सरकार अल्पमतमा परेको थियो। त्यसयता नेकपाले नेपाली कांग्रेसका मुख्यमन्त्री कृष्णप्रसाद यादवलाई साथ दिँदै आएको थियो। सरकारले अब आठ दिनभित्र विश्वासको मत लिनुपर्ने अवस्था छ।
यसैबीच, एमालेले जसपा र नेकपासहित नयाँ समीकरण बनेको दाबी गरेको छ। एमाले संसदीय दलका नेता सरोजकुमार यादवले केन्द्रमा तीन दलका शीर्ष नेताबीच छलफल भएर समीकरण बनेको बताएका छन्। तर जसपा नेपालका अध्यक्ष उपेन्द्र यादवले उक्त दाबी अस्वीकार गर्दै सामाजिक सञ्जालमा टिप्पणी गरेका छन्। जसपाभित्र भने समीकरण बनेको दाबी गर्ने आवाज पनि सुनिएको छ।
