सिरहामा निर्माणाधीन सडकमा ग्राभेल हाल्नुपर्ने ठाउँमा माटो प्रयोग गरिएको भन्दै स्थानीयले निर्माण कार्य रोकाएका छन्। मधेश प्रदेश सरकारको ‘एक निर्वाचन क्षेत्र, एक सडक’ कार्यक्रमअन्तर्गत गोलबजार नगरपालिका–१० देखि नरहाको देवीपुरसम्मको सडक निर्माण भइरहेको छ।
उक्त ४ किलोमिटर ७४५ मिटर लामो सडक अस्फाल्ट कालोपत्रे गर्ने गरी २०८२ साल जेठ १४ गते एटलस इन्जिनियरिङ एन्ड कन्स्ट्रक्सन कम्पनी प्रालि र पवित्र निर्माण सेवा, काठमाडौं नयाँ बजारको संयुक्त उपक्रमसँग ११ करोड ५० लाख ४ हजार ३२५ रुपैयाँमा ठेक्का सम्झौता भएको थियो। निर्माण २०८३ साल मंसिर १३ गतेभित्र सक्नुपर्ने छ।
स्थानीयका अनुसार राति गाउँले सुतेपछि ग्राभेलको सट्टा माटो खसाल्ने गरिएको छ। गोलबजार–७ कदिमाटोलका इन्द्रदेव यादवले जता पायो त्यतैबाट उत्खनन् गरेर रुखका जरासमेत भएको माटो हालिएको बताए। स्थानीय श्रवण यादवले अनियमितताबारे पटक–पटक जानकारी गराउँदा पनि सुनुवाइ नभएको गुनासो गरे।
भौतिक पूर्वाधार कार्यालय सिरहाका इन्जिनियर रविन्द्र महतोले अनुगमनका क्रममा केही स्थानमा माटो प्रयोग भएको पाइएको स्वीकार गर्दै उक्त माटो हटाउन निर्देशन दिएका छन्। प्रयोगशाला परीक्षणको प्रतिवेदन नआएसम्म निर्माण रोक्न पनि उनले निर्देशन दिएका छन्।
निर्माण कम्पनीका साइट इन्चार्ज गोपाल हमालले केही स्थानमा माटो खसेको स्वीकार गरे पनि त्यो ग्राभेल नै भएको दाबी गरे। उनले सामग्री परीक्षणका लागि प्रयोगशालामा पठाइने र प्रतिवेदन आएपछि मात्र थप कुरा स्पष्ट हुने बताए। स्थानीयले निष्पक्ष प्रयोगशाला परीक्षण, गुणस्तरअनुसार काम र नियमित अनुगमनको माग गरेका छन्।
