काठमाडौँ । विश्व फुटबलको सर्वोच्च निकाय फिफाको अध्यक्ष पदका लागि जापानबाट उम्मेदवारी घोषणा भएको छ। जापान फुटबल सङ्घका मानार्थ अध्यक्ष कोजो ताशिमाले बिहीबार वर्तमान अध्यक्ष जियानी इन्फान्टिनोविरुद्ध चुनाव लड्ने घोषणा गरेका हुन्।
फिफा अध्यक्षको निर्वाचन आगामी मार्चमा हुँदैछ। ताशिमाको घोषणासँगै इन्फान्टिनोलाई चुनौती दिने उम्मेदवारको सङ्ख्या दुई पुगेको छ। यसअघि टोटनहमका पूर्व डिफेन्डर रामोन भेगाले पनि उम्मेदवारी घोषणा गरिसकेका छन्।
६८ वर्षीय ताशिमा फिफा काउन्सिलका पूर्व सदस्य हुन् र जापानी फुटबलमा उनको छुट्टै पहिचान छ। सन् २०१६ देखि २०२४ सम्म उनी जापान फुटबल सङ्घको अध्यक्ष रहिसकेका छन्।
उम्मेदवारी घोषणा गर्दै ताशिमाले जापान फुटबल सङ्घको पूर्ण समर्थनमा आफूले यो निर्णय लिएको बताए। जापानी फुटबलले लामो समयदेखि अँगालेका इमानदारी, निष्ठा र उच्च नैतिक मापदण्डलाई विश्व फुटबल समुदायसम्म पुर्याउनु महत्त्वपूर्ण रहेको उनको भनाइ छ। आफ्नो वर्षौंदेखिको अनुभवले विश्व फुटबलको विकासमा योगदान दिने दृढता व्यक्त गर्दै उनले चुनौती स्वीकारेको बताए।
उम्मेदवारी घोषणा गर्ने अन्तिम मिति नोभेम्बर १८ हो। पदासीन इन्फान्टिनो चौथो तथा अन्तिम कार्यकालका लागि पुनः निर्वाचित हुन खोजिरहेका छन्। विश्वकपको टिकट बिक्री योजना विफल भएपछि उनले चर्को आलोचना र राजीनामाको मागको सामना गरिरहेका छन्। गत महिना एसियाली फुटबल महासङ्घले ५६ वर्षीय इन्फान्टिनोलाई समर्थन गरेपछि उनी पुनः निर्वाचनमा बलियो स्थितिमा रहेको ठानिएको थियो। इन्फान्टिनोले यसअघि सदस्य सङ्घहरूको अत्यधिक ठुलो बहुमतको समर्थन रहेको भन्दै राजीनामाको माग अस्वीकार गरेका थिए।
