काठमाडौं — संयुक्त राष्ट्रसंघीय जलवायु सम्मेलन कोप–३१ नजिकिँदै गर्दा नेपालको तयारीबारे छलफल तीव्र भएको छ। नोभेम्बर ९ देखि २० सम्म टर्कीको आन्ताल्यामा हुने सम्मेलनमा सहभागी हुने सरकारी टोलीले बिहीबार राष्ट्रिय स्वतन्त्र पार्टीका सभापति रवि लामिछानेलाई भेटेर तयारीबारे जानकारी गराएको हो।
परराष्ट्रमन्त्री शिशिर खनालको नेतृत्वमा रहेको टोलीमा कृषि, वन तथा वातावरणमन्त्री गीता चौधरी, प्रतिनिधिसभा सदस्य र जलवायु विज्ञ सहभागी थिए। भेटमा सम्मेलनमा नेपालले उठाउने प्राथमिकता, प्रतिनिधिमण्डलको संरचना र जलवायु कूटनीतिका विषयमा कुराकानी भएको मन्त्री चौधरीको सचिवालयले जनाएको छ।
सभापति लामिछानेले सम्मेलनमा नेपालले सशक्त उपस्थिति जनाउनुपर्ने र जलवायु परिवर्तनबाट देशले भोगिरहेको असरबारे अन्तरराष्ट्रिय समुदायलाई स्पष्ट रूपमा जानकारी गराउनुपर्ने बताए।
नेपालले सम्मेलनमा विकसित मुलुकहरूबाट उत्सर्जन कटौतीमा थप प्रतिबद्धता, अल्पविकसित तथा हिमाली मुलुकका लागि सहज र पूर्वानुमानयोग्य जलवायु वित्त, प्रविधि हस्तान्तरण र हिमाललाई औपचारिक कार्यसूचीमा समावेश गराउने विषयलाई जोड दिने तयारी गरेको छ। नेपाल र भुटानले हिमाली मुद्दालाई संयुक्त रूपमा अघि बढाउने तथा हिमनदी पग्लने र समुद्री सतह बढ्ने विषयलाई क्षेत्रीय सहकार्य र पूर्वसूचना प्रणालीमार्फत सम्बोधन गर्ने योजना पनि छ।
सम्मेलनअघि सरकारले राष्ट्रिय जलवायु शिखर सम्मेलन आयोजना गर्नुका साथै विभिन्न निकाय, प्रदेश, स्थानीय तह, विकास साझेदार, नागरिक समाज, प्राज्ञिक क्षेत्र र निजी क्षेत्रका सुझाव समेटेर अवधारणापत्र तयार गरेको छ। प्रतिनिधिमण्डलको नेतृत्व परराष्ट्रमन्त्री खनालले गर्नेछन्।
