काठमाडौं । पूर्वप्रहरी नायब महानिरीक्षक रमेश खरेलले प्रधानमन्त्री बालेन्द्र शाहको नेतृत्वमा रहेको सरकारको कार्यशैलीमाथि गम्भीर असन्तुष्टि व्यक्त गरेका छन्। बुधबार सामाजिक सञ्जाल फेसबुकमा आफ्नो धारणा सार्वजनिक गर्दै उनले सरकार लोकतन्त्रका मूल्यविपरीत निरंकुश प्रवृत्तितर्फ उन्मुख भएको आरोप लगाए।
खरेलका अनुसार सरकारले प्रतिपक्षको आवाज दबाउने, सञ्चारमाध्यममाथि दबाब सिर्जना गर्ने र प्रश्न उठाउने व्यक्तिलाई नै निशाना बनाउने काम गरिरहेको छ। उनले सरकारले आफूमाथि उठेका प्रश्नको उत्तर दिनुपर्नेमा प्रश्नकर्तालाई नै दबाब दिने प्रवृत्ति अपनाएको बताए। यस्तो प्रवृत्ति लोकतन्त्रका लागि चिन्ताजनक भएको उनको भनाइ छ।
नेपाली कांग्रेसका सभापति गगन थापाले सरकारमाथि प्रश्न उठाउँदा उनलाई फसाउने प्रयास भएको उल्लेख गर्दै खरेलले आलोचनाको जवाफ तथ्य र तर्कबाट दिन प्रधानमन्त्रीलाई सुझाव दिएका छन्। सरकारलाई प्रश्न गर्नु प्रतिपक्षको अधिकार मात्र नभई जिम्मेवारी पनि भएको उनले स्पष्ट पारेका छन्।
खरेलले लोकतन्त्रमा सरकारको आलोचना गर्नु र प्रश्न उठाउनु स्वाभाविक प्रक्रिया भएको उल्लेख गर्दै त्यसलाई दबाउन खोज्नु लोकतान्त्रिक अभ्यासविपरीत हुने बताए।
प्रधानमन्त्री शाहलाई सम्बोधन गर्दै खरेलले ‘बालेन, दिस् इज् नट् डन्’ भन्दै सरकारको कार्यशैली स्वीकार्य नभएको सन्देश दिएका छन्।
