सर्वोच्च अदालतले व्यवसायी दीपक भट्टको बन्दीप्रत्यक्षीकरण रिटमा विशेष अदालत र उच्च अदालत पाटनबाट सम्बन्धित मुद्दाका प्रमाण मिसिल झिकाउन आदेश दिएको छ। न्यायाधीश शारङ्गा सुवेदी र नित्यानन्द पाण्डेयको संयुक्त इजलासले बुधबार उक्त आदेश जारी गरेको हो।
भट्टका बुबा चतुर्भुज भट्टले छोराको थुना गैरकानुनी भएको दाबी गर्दै रिहाइको मागसहित रिट दायर गरेका थिए। उक्त रिटमा विशेष अदालत काठमाडौंसमेतलाई विपक्षी बनाइएको छ।
अदालतले यसअघि सर्वोच्चमा विचाराधीन रहेका दुई निवेदनलाई पनि प्रस्तुत रिटसँगै लगाउमा राखेर पेस गर्न भनेको छ। ती निवेदन बेरीतको आदेश बदर गर्नेसम्बन्धी हुन्।
त्यसैगरी सम्पत्ति शुद्धीकरण मुद्दाको सुरु प्रमाण मिसिल विशेष अदालत काठमाडौंबाट झिकाउन आदेश भएको छ। नेपाल सरकार वादी रहेको उक्त मुद्दामा दीपक भट्टसमेत प्रतिवादी छन्। मिसिल पेसीका दिन देखाएर फिर्ता लैजाने गरी झिकाउन भनिएको छ।
बैंकिङ कसूर मुद्दाको प्रमाण मिसिल पनि उच्च अदालत पाटनबाट सोही प्रक्रियाअनुसार झिकाउन आदेश जारी भएको छ।
सम्पत्ति शुद्धीकरण तथा बैंकिङ कसूर प्रकरणमा न्यायिक हिरासतमा रहेका भट्टको थुना बदर गरी रिहाइ गर्नुपर्ने माग रिटमा गरिएको छ।
