उत्तरी गोरखाको मनास्लु क्षेत्रमा मङ्गलबार बिहानदेखि सुक्खा पहिरो निरन्तर झरिरहेको छ। चुमनुब्री गाउँपालिका–५ क्य्राकमा गएको पहिरोले सेराङ गुम्बा जाने बाटो प्रभावित भएको छ।
वडाध्यक्ष काल्देन छेवाङ लामाका अनुसार क्य्राकबाट सेराङ गुम्बा जाने बाटोमा पर्ने बुम्राङमा ठूलो पहिरो झरिरहेको छ। बिहान ११ बजेतिर धुवाँ उडेजस्तो देखिएर पहिरो झरेको थियो। दिउँसो १ बजेतिर गएर हेर्दा पनि पहिरो झरिरहेकै थियो। राति पनि उस्तै गरी झर्यो।
साकिमा डाँडाबाट सेराङ खोलासम्म करिब ३०० मिटरभन्दा लामो पहिरो झरेको लामाले बताए। डाँडाबाट खोलासम्मको दूरी करिब ३०० मिटर छ। पहिरो अहिले पनि झरिरहेकाले कति फराकिलो छ भन्ने थाहा पाउन सकिएको छैन।
पहिरोका कारण सेराङ गुम्बामा रहेका करिब ४०० जनालाई समस्या परेको छ। गुम्बामा लामा पढ्ने करिब २०० विद्यार्थी छन्। लामा गुरु र गुम्बाको वृद्धाश्रममा गरी थप २०० जना त्यहाँ बस्छन्। उनीहरूलाई रासनलगायत आवश्यक सामग्री पुर्याउन कठिन हुने भएको छ।
हिमाली भेगमा सुक्खा पहिरो र हिमपहिरो धमाधम झर्न थालेपछि स्थानीयबासी चिन्तित बनेका छन्। केही समयअघि असोज २५ गते सेराङ हिमालको पूर्वी पाटोमा हिमपहिरो खसेर उङ्गिलुङ खोला थुनिएको थियो। त्यसपछि बूढीगण्डकीमा विनाशकारी बाढी गएको थियो।
