यु-१९ एसिया कप क्रिकेट प्रतियोगिता आजदेखि ओमानमा सुरु हुँदैछ। अल अमेरातमा हुने यो प्रतियोगिता कात्तिक २८ गतेसम्म चल्नेछ।
नेपाल प्रतियोगिताको समूह ‘ए’ मा रहेको छ। समूह चरणमा नेपालले कात्तिक २० गते भारत, २२ गते युनाइटेड अरब इमिरेट्स र २४ गते पाकिस्तानसँग खेल्नेछ।
प्रतियोगिताका लागि नेपालले विपिनप्रसाद शर्माको कप्तानीमा टोली घोषणा गरिसकेको छ। टोलीमा निरजकुमार यादव, प्रसिद्ध जैशी, सोहेल कुँवर, दर्श सुनार, रोहित चन्द, निश्चल क्षेत्री, आशिष लुहार, रोशन शाही, सूर्यान्शु कोइराला, अभय यादव, सुशील रावल, नितेशकुमार पटेल, शुभम खनाल र सचिन भट्ट रहेका छन्।
उद्घाटनको दिन आज दुई खेल हुँदैछन्। मलेसिया र श्रीलंकाबीच तथा अफगानिस्तान र बंगलादेशबीच बिहान पौने ११ बजेदेखि खेल सुरु हुनेछ।
युवा खेलाडीहरूका लागि यो प्रतियोगिता आफ्नो क्षमता देखाउने महत्त्वपूर्ण अवसर मानिएको छ। नेपालले समूह चरण पार गरेर अघिल्लो चरणमा पुग्ने लक्ष्य राखेको छ।
