प्रमुख प्रतिपक्षी दल नेपाली कांग्रेसका पदाधिकारीहरूको अनौपचारिक बैठक आज बस्दै छ। पार्टीको केन्द्रीय कार्यालय सानेपामा बिहीबार दिउँसो ३ बजे बैठक बस्न लागेको हो।
बैठकमा पछिल्ला राजनीतिक घटनाक्रमबारे पार्टीको धारणा तय गरिने छ। सरकारले प्रहरी महानिरीक्षक दानबहादुर कार्कीलाई हटाएर मनोज कार्कीलाई नियुक्त गरेको विषय बैठकको मुख्य एजेन्डा बन्ने एक नेताले बताए।
हालै सार्वजनिक भएको इनम सापकोटाको अडियोमा सभापति गगन थापाले पार्टीलाई वैधानिकता दिलाउन १८ करोड रुपैयाँ खर्चेको भन्ने प्रसंग पनि छलफलमा आउने छ। कांग्रेसले यसलाई सरकारको षडयन्त्र भनेको छ। निराधार, कपोकल्पित र नियोजित आरोप लगाएर पार्टीको वैधानिकतामाथि प्रश्न उठाउन खोजिएको कांग्रेसको बुझाइ छ।
सरकार प्रतिपक्षको आवाज थुन्न लागिपरेको कांग्रेसको आरोप छ। न्यायपालिकाको स्वतन्त्रता र प्रेस स्वतन्त्रतामाथिको हस्तक्षेपविरुद्ध राजनीतिक तथा कानुनी प्रतिवाद गर्ने पार्टीले बताउँदै आएको छ। पत्रकारहरूमाथिको धरपकडलगायत सरकारका पछिल्ला विवादित गतिविधिविरुद्ध संसदीय छानबिन समिति गठन हुनुपर्ने माग राख्दै कांग्रेसले चाँडोभन्दा चाँडो प्रतिनिधिसभाको बैठक बोलाउन समेत माग गरेको छ।
पार्टीकी महामन्त्री डा. डिला संग्रौलाले अनौपचारिक बैठक बस्न लागेको पुष्टि गरिन्। औपचारिक बैठक नभएको बताउँदै उनले समसामयिक विषयमा छलफल हुने जानकारी दिइन्। सहमहामन्त्री मनोजमणि आचार्यका अनुसार जिल्ला र प्रदेशमा अधिवेशन हुन बाँकी रहेकाले संगठनका समसामयिक विषयमा महामन्त्री र सहमहामन्त्रीहरूबीच छलफल गर्न बैठक बस्न लागेको हो।
