नेपाली यू–१९ महिला क्रिकेट टोलीले चीनमा भइरहेको बेल्ट एन्ड रोड शृङ्खलामा हङकङमाथि ९२ रनको फराकिलो जित हात पारेको छ। नेपालले दिएको १४७ रनको लक्ष्य पछ्याएको हङकङ १८ ओभरमा ५४ रनमै अलआउट भयो।
पहिले ब्याटिङ गरेको नेपालले १९ दशमलव ५ ओभरमा सबै विकेट गुमाएर १४६ रन बनाएको थियो। नेपालका लागि सोनी पाख्रिनले सर्वाधिक ४४ रन बनाइन्। उनले २८ बलमा ४ चौका र २ छक्का प्रहार गरिन्। सबित्री धामीले २६ बलमा ३६ रन जोड्दै टोलीलाई राम्रो सुरुवात दिलाइन्। त्रिसना विश्वकर्माले १२, रचना चौधरीले ११ र ए पाथकले १३ रनको योगदान दिए। अन्य ब्याटरले दोहोरो अंकमा रन बनाउन सकेनन्।
बलिङतर्फ नेपालकी मनिषा चौधरीले ३ ओभरमा ८ रन खर्चेर ३ विकेट लिइन्। रचना चौधरीले ४ ओभरमा ५ रन मात्र दिएर ३ विकेट हात पारिन्। साक्षी यादवले २ विकेट लिँदा आशिका महरा र तिर्सना विश्वकर्माले समान १–१ विकेट लिए।
हङकङका लागि वान तुङ सो र मान केई लेउङले समान १२ रन बनाउनु सर्वाधिक व्यक्तिगत स्कोर रह्यो। अन्य ब्याटर दोहोरो अंकमा पुग्न सकेनन्।
नेपालले सन् २०२७ मा आयोजना हुने आईसीसी यू–१९ महिला टी–२० विश्वकपलाई लक्षित गर्दै यो शृङ्खला खेलिरहेको छ। नोभेम्बर ३ देखि ८ सम्म चल्ने प्रतियोगितामा नेपालसहित आयोजक चीन, हङकङ र थाइल्यान्ड सहभागी छन्। नेपालले यसअघि नोभेम्बर ३ मा थाइल्यान्ड र नोभेम्बर ४ मा चीनसँग खेलेको थियो। नोभेम्बर ८ मा नेपालले हङकङसँग पुनः प्रतिस्पर्धा गर्नेछ।
चीन भ्रमणपछि नेपाली टोलीले भारतको बैंगलोरमा नोभेम्बर १२ देखि २२ सम्म हुने त्रिकोणात्मक शृङ्खला खेल्नेछ, जसमा भारतका यू–१९ महिला ‘ए’ र ‘बी’ टोलीसँग प्रतिस्पर्धा हुनेछ। नेपाल र बंगलादेशले संयुक्त रूपमा सन् २०२७ जनवरी २१ देखि फेब्रुअरी ६ सम्म यू–१९ महिला टी–२० विश्वकप आयोजना गर्दैछन्।
