काठमाडौँ महानगरपालिकाको चालु आर्थिक वर्ष २०८२/८३ मा अहिलेसम्म कुल बजेटको ५८ दशमलव ५५ प्रतिशत रकम खर्च भएको छ। महानगरको अन्तिम लेखा परीक्षणका लागि गरिएको प्रवेश बैठकमा वित्त विभागका प्रमुख विकास चित्रकारले यो विवरण सार्वजनिक गरेका हुन्।
उनका अनुसार महानगरका विभागहरूको औसत खर्च ३८ दशमलव ३४ प्रतिशत मात्र छ भने वडाहरूको औसत खर्च ६३ दशमलव ९१ प्रतिशत पुगेको छ। सञ्चित कोषबाट भएको खर्चकै आधारमा अन्तिम लेखा परीक्षण गरिने बताइएको छ।
अन्तिम लेखा परीक्षणका लागि महालेखा परीक्षकको कार्यालयका अधिकारीहरूसँग कात्तिक १८ गते प्रवेश बैठक भएको थियो। सो बैठकमा महानगरको केन्द्र, ३२ वटा वडा, हनुमानढोका दरबार संरक्षण कार्यक्रम र जग्गा एकीकरण आयोजनासहित ३५ वटा एकाइको छुट्टाछुट्टै परीक्षण गरी प्रारम्भिक प्रतिवेदन तयार गरिने जानकारी दिइएको थियो।
महानगरपालिकाले वित्तीय सुशासनका लागि पूर्वलेखा परीक्षण, आन्तरिक लेखा परीक्षण र अन्तिम लेखा परीक्षण गरी तीन चरणमा लेखा परीक्षण गर्दै आएको छ।
बैठकमा कार्यवाहक प्रमुख सुनिता डंगोलले लेखा परीक्षकले मागेका कागजात, कारण र प्रमाण समयमै उपलब्ध गराउन तथा प्रतिवेदन तयार हुनुअघि नै प्रक्रिया र प्रमाणबाट विधि पुष्टि गर्न अधिकारीहरूलाई निर्देशन दिएकी थिइन्।
