ग्लोबल आइएमई बैंक लिमिटेडले काठमाडौंको उत्तरढोकामा अत्याधुनिक कर्पोरेट भवन निर्माणको काम अघि बढाएको छ। शुक्रबार निर्माणस्थलमा आयोजित समारोहमा बैंक सञ्चालक समितिका अध्यक्ष चन्द्रप्रसाद ढकाल र प्रमुख कार्यकारी अधिकृत सुरेन्द्रराज रेग्मीले विधिपूर्वक भूमिपूजा गर्दै भवन निर्माणको औपचारिक सुरुआत गरेका हुन्।
करिब एक लाख ४६ हजार वर्गफिट क्षेत्रफलमा फैलिने यो भवन कुल १२ तलाको हुनेछ। भवनमा गाडी पार्किङका लागि दुई तला भूमिगत बेसमेन्ट, एउटा भुइँतला र माथि नौ वटा तला रहनेछन्। वातावरणमैत्री पूर्वाधार, आधुनिक वास्तुकला र अत्याधुनिक प्रविधि समेटेर बैंकले यसलाई उपत्यकाकै नमुना व्यावसायिक भवनका रूपमा उभ्याउने योजना बनाएको छ।
भूमिपूजापछि बोल्दै अध्यक्ष ढकालले नयाँ भवन वाणिज्य बैंकहरूका कर्पोरेट कार्यालयमध्ये सबैभन्दा आधुनिक र ठूलो संरचना हुने बताए। उनका अनुसार सुविधासम्पन्न नयाँ भवन काठमाडौं उपत्यकाको एउटा नमुना भवन बन्नेछ।
भवनलाई ऊर्जा दक्ष र वातावरणमैत्री बनाउन सौर्य ऊर्जा प्रणाली जडान गरिनेछ भने वर्षाको पानी सङ्कलन तथा पुनःप्रयोग गर्ने व्यवस्था पनि राखिनेछ। जमिनको स्थिरता र आसपासको सुरक्षालाई ध्यानमा राखेर निर्माणमा सेक्यान्ट पाइलिङ प्रविधि प्रयोग गरिने बैंकले जनाएको छ।
