पोखरा । काठमाडौंको रात्रिकालीन मनोरञ्जन व्यवसायलाई नयाँ उचाइमा पुर्याएका व्यवसायी विशाल तुलाचन अब आफ्नै जन्मथलो पोखरामा ५० करोड रुपैयाँभन्दा बढी लगानीमा विश्वस्तरीय क्लब निर्माण गर्ने तयारीमा छन्। क्लब, रेस्टुरेन्ट, फुड कोर्ट, स्पा, रूफटप रेस्टुरेन्ट र बालबालिकाका लागि प्ले जोनसहितको ‘भलक्यानो’ एक वर्षभित्र सञ्चालनमा ल्याउने उनको लक्ष्य छ।
करिब तीन रोपनी जग्गामा फैलिने यस परियोजनाका लागि उनले ‘अर्बन भेन्चर्स’ कम्पनी स्थापना गरेका छन्। परियोजनाको तयारी अघि बढिसकेको र जग्गा भाडामा लिएर आवश्यक प्रक्रिया अगाडि बढाइएको उनले बताएका छन्। भलक्यानो नेपालमा मात्र नभई अन्तर्राष्ट्रिय स्तरमै उदाहरणीय क्लब बन्ने उनको दाबी छ।
क्लबको डिजाइन तयार गर्दा उनले सिंगापुर, भियतनाम, थाइल्यान्ड र स्पेनका क्लबहरूको डिजाइन तथा संरचनाको अध्ययन गरेका छन्। ती देशका क्लबमा देखेका विशेषतालाई समेटेर पोखराको आवश्यकता, पर्यटकीय सम्भावना र नेपाली ग्राहकको रुचिअनुसार नयाँ स्वरूप तयार गर्नु उनको मुख्य लक्ष्य हो। उनको अनुमानमा भलक्यानो सञ्चालनमा आएपछि करिब १२० जनाले प्रत्यक्ष रोजगारी पाउनेछन्।
विशालले काठमाडौंको ठमेलमा ‘नोभा’ क्लब स्थापना गरेर नेपाली क्लब व्यवसायलाई हेर्ने दृष्टिकोणमा परिवर्तन ल्याउने प्रयास गरेका थिए। सुरूमा एक्लै लगानी गरेर अघि बढाएको व्यवसायमा पछि थप सात जना साझेदार जोडिए। नोभाले अहिले करिब १७० जनालाई रोजगारी दिएको छ। केही महिनाअघि उनले काठमाडौँको बानेश्वरमा प्रिमियम ब्यांक्वेट ‘बानेश्वर हिल्स’ सञ्चालनमा ल्याएका थिए।
उनका बुबा राजेन्द्रबहादुर तुलाचनले सन् १९८४ मा अरुणा बेकरी स्थापना गरेका थिए। सन् १९९८ मा विशालले कन्दरा ब्यान्ड र गायक सामसुङ तामाङलाई पोखरा ल्याएर भव्य कार्यक्रम आयोजना गरेका थिए। सन् १९९९ मा जापान गएर फोटोग्राफी अध्ययन गरेका उनी सन् २००५ मा नेपाल फर्किएपछि रियल इस्टेट तथा हाउजिङ व्यवसायमा लागे। पोखरा फेवाताल, हिमाली दृश्य र साहसिक पर्यटनका कारण देशभित्र र बाहिर परिचित छ। अन्तर्राष्ट्रिय पर्यटकलाई लक्षित गरेर निर्माण गर्न लागिएको भलक्यानोले पोखराको पर्यटनलाई फरक आयाम दिन सक्ने उनको विश्वास छ।
