काठमाडौं । तिहारको अवधिभर काभ्रेपलाञ्चोक जिल्लाका मुख्य तथा सहायक सडकहरूमा टिपर चलाउन रोक लगाइएको छ । जिल्ला प्रशासन कार्यालय काभ्रेपलाञ्चोकले सूचना जारी गर्दै चाडपर्वको समयमा सवारी चाप घटाउन र दुर्घटनाको जोखिम कम गर्न यस्तो निर्णय गरिएको जनाएको छ ।
जिल्ला सुरक्षा समितिको बैठकले गरेको निर्णय अनुसार कात्तिक २२ गते बिहान ५ बजेदेखि कात्तिक २६ गते बेलुका ९ बजेसम्म जिल्लाभित्रका मुख्य र सहायक सडकमा टिपर सञ्चालन गर्न पाइने छैन । यसअघिका वर्षहरूमा पनि तिहारका बेला यस्तै रोक लगाइने गरिएको प्रशासनले जनाएको छ ।
चाडपर्वका बेला सडकमा सवारी साधनको चाप बढ्ने भएकाले यात्रुबाहक सवारीको आवागमन सहज बनाउन टिपर रोकिएको हो । टिपर सञ्चालन बन्द हुँदा सडकमा भीड घट्ने र दुर्घटनाको सम्भावना कम हुने प्रशासनको अपेक्षा छ ।
जिल्ला प्रशासन कार्यालयले सम्बन्धित सबैलाई तोकिएको अवधिभर टिपर नचलाउन र नचलाउन लगाउन अनुरोध गरेको छ ।
