काठमाडौं । राष्ट्रिय स्वतन्त्र पार्टीका सभापति रवि लामिछानेले स्थानीय तहको निर्वाचनका लागि पार्टीभित्र वडाध्यक्ष र सदस्य पदमा उम्मेदवार बन्ने इच्छा निकै कम देखिएको भन्दै असन्तुष्टि व्यक्त गरेका छन् । चितवनमा शुक्रबार आयोजित कार्यक्रममा उनले कार्यकर्ताहरूलाई तल्लो तहको जिम्मेवारीबाट भाग्न नहुने सन्देश दिए ।
पार्टीले गाउँपालिकाका लागि भदौ १ गतेदेखि र नगरपालिकाका लागि असोज २८ गतेदेखि उम्मेदवार बन्न इच्छुकहरूबाट आवेदन मागेको थियो । अहिलेसम्म आएका आवेदनहरू अधिकांश नगर प्रमुख र गाउँपालिका अध्यक्ष पदका लागि मात्र रहेको लामिछानेले बताए । वडाध्यक्ष र सदस्यका लागि अपेक्षा गरेजस्तो आवेदन नआएको उनको भनाइ थियो ।
सभापति लामिछानेले व्यंग्यात्मक शैलीमा भने, वडाध्यक्ष बन्ने हो भने आफैंले पदबाट राजीनामा दिएर चुनाव लड्न आउनुपर्ने अवस्था देखिएको छ । साथीहरूले एकैपटक पालिका प्रमुख बन्ने सपना देखेको तर तलको जिम्मेवारी लिन नचाहेको उनले टिप्पणी गरे ।
प्रमुख पदमा मात्रै आवेदन दिनु अवसरवादी राजनीति भएको उनको ठहर छ । उनले कार्यकर्तालाई अवसरको राजनीति नगर्न र विगतमा कांग्रेस तथा कम्युनिस्टहरूले देखाएको निष्ठाको राजनीतिबाट सिक्न आग्रह गरे । पञ्चायतकालका ३० वर्षमा कांग्रेसका नेता कार्यकर्ताले अवसर पाइन्छ भनेर राजनीति नगरेको स्मरण गराउँदै उनले त्यही मूल्य अपनाउन सुझाव दिए ।
