काठमाडौं — बेलायतको लन्डनमा आयोजित विश्वकै ठूलो अन्तर्राष्ट्रिय पर्यटन व्यापार मेला ‘वर्ल्ड ट्राभल मार्केट लन्डन २०२६’ मा नेपालले वेलनेस, साहसिक, सांस्कृतिक तथा दिगो पर्यटनका विविध सम्भावना प्रस्तुत गरेको छ। नोभेम्बर ३ देखि ५ सम्म लन्डनको एक्सेल प्रदर्शनी केन्द्रमा भएको मेलामा संस्कृति, पर्यटन तथा नागरिक उड्डयनमन्त्री खडकराज पौडेल ‘गनेस’ को नेतृत्वमा नेपाल पर्यटन बोर्डसहित ३२ वटा पर्यटनसम्बद्ध निजी कम्पनी सहभागी भएका थिए।
मेलामार्फत अन्तर्राष्ट्रिय पर्यटन व्यवसायी, ट्राभल बायर र सञ्चारमाध्यमका प्रतिनिधिसँग व्यावसायिक सम्बन्ध विस्तार गर्दै नेपालका पर्यटन उत्पादन र सेवाको अन्तर्राष्ट्रिय बजारमा प्रवर्द्धन गरिएको हो।
नेपालको सहभागिताले विशेषगरी सन् २०२७ मा मनाउन लागिएको ‘नेपाल वेलनेस पर्यटन वर्ष’ लाई अन्तर्राष्ट्रिय बजारमा चिनाउने लक्ष्य लिएको थियो। योग, ध्यान, आध्यात्मिक पुनर्ताजगी तथा समग्र स्वास्थ्यसँग जोडिएका पर्यटन अनुभवको प्रवर्द्धन गर्नुका साथै हिमाली साहसिक पर्यटनभन्दा बाहिरका विविध गन्तव्य र अनुभवलाई विश्वसामु प्रस्तुत गर्ने विषयलाई प्राथमिकता दिइएको थियो।
मेलामा नेपालले हिमाल आरोहण र पदयात्रासँगै उच्च हिमाली म्याराथन, माउन्टेन बाइकिङ, र्याफ्टिङ, वन्यजन्तु अवलोकन, सांस्कृतिक सम्पदा, सामुदायिक पर्यटन र आध्यात्मिक पर्यटनका सम्भावना प्रस्तुत गर्यो। प्राकृतिक सौन्दर्य, जीवन्त संस्कृति र स्थानीय समुदायसँगको अन्तरक्रियालाई समेटेर नेपाललाई विविध अनुभव दिने जिम्मेवार तथा दिगो पर्यटन गन्तव्यका रूपमा स्थापित गर्ने प्रयास गरिएको थियो।
नेपालको प्रतिनिधिमण्डलमा नेपाल पर्यटन बोर्डका कार्यकारी समिति सदस्य तथा अर्थ मन्त्रालयका सहसचिव शंकरबहादुर केसी पनि सहभागी थिए। नेपाल पेभिलियनको उद्घाटन मन्त्री पौडेलले प्रतिनिधिसभा सदस्य मनीष झाको उपस्थितिमा गरेका थिए।
मेलाको अवसरमा मन्त्री पौडेलले भारतका केन्द्रीय पर्यटन तथा संस्कृति मन्त्री गजेन्द्रसिंह शेखावत, भारतीय राज्यसभाका सदस्य सुधा मूर्ति, संयुक्त अरब इमिरेट्सका अर्थतन्त्र तथा पर्यटनमन्त्री अब्दुल्ला बिन तौक अल मारी र श्रीलङ्काका पर्यटन उपमन्त्री प्रा. रुवान रणतुङ्गासँग भेटवार्ता गरेका थिए। भेटमा द्विपक्षीय पर्यटन सहकार्य सुदृढ गर्ने, हवाई सम्पर्क विस्तार गर्ने र पर्यटन क्षेत्रमा लगानीका सम्भावना खोज्ने विषयमा छलफल भएको थियो।
