पोखरा — तिहारमा कास्कीमा देउसीभैलो खेल्दा राति १० बजेभन्दा बढी समय नलाग्ने गरी जिल्ला प्रशासनले नियम बनाएको छ । पर्वलाई मर्यादित, अनुशासित, सभ्य र सुरक्षित बनाउन प्रशासनले सूचना जारी गर्दै १० बजेपछि देउसीभैलो कार्यक्रम रोक्न भनेको हो ।
सहायक प्रमुख जिल्ला अधिकारी रमेश घर्तीले मौलिक संस्कृति र परम्पराको संरक्षण गर्दै शान्ति सुरक्षामा असर नपर्ने गरी कार्यक्रम सञ्चालन गर्न सबैलाई आग्रह गरेका छन् ।
प्रशासनले देउसीभैलोमा डिजे बजाउन र चर्को आवाज निकाल्न रोक लगाएको छ । ध्वनि प्रदूषण हुने गरी डिजे, ठूलो आवाजमा माइक, लाउडस्पिकर र बाजा बजाउन पूर्ण रूपमा निषेध गरिएको छ ।
देउसीभैलोका नाममा कसैसँग जबर्जस्ती पैसा माग्न, दबाब दिन, धम्क्याउन वा अभद्र व्यवहार गर्न पाइने छैन । घर, निजी आवास, कार्यालय वा व्यापारिक प्रतिष्ठानमा देउसीभैलो खेल्न जाँदा सम्बन्धित घरधनी वा जिम्मेवार व्यक्तिबाट पहिले अनुमति लिनुपर्नेछ ।
सहभागीले मादक पदार्थ सेवन गरेर कार्यक्रम चलाउन, होहल्ला गर्न, झगडा गर्न वा सार्वजनिक शान्ति सुरक्षामा खलल पार्न पाइने छैन । पटका र आतिसबाजीमा पूर्ण प्रतिबन्ध लगाइएको छ ।
सडक, चोक, गल्ली र फुटपाथमा सवारी तथा पैदलयात्रीलाई बाधा पुग्ने गरी कार्यक्रम गर्न नहुने प्रशासनले जनाएको छ । अस्पताल, स्वास्थ्य संस्था, विद्यालय र वृद्धाश्रमजस्ता संवेदनशील ठाउँमा सर्वसाधारणलाई बाधा नपुग्ने गरी विशेष सावधानी अपनाउनुपर्नेछ । बालबालिकालाई सहभागी गराउँदा अभिभावकको प्रत्यक्ष निगरानीमा राख्नुपर्नेछ ।
कुनै पनि जातजाति, धर्म, भाषा वा समुदायप्रति घृणा, द्वेष वा अपमान फैलाउने गीत, नारा वा गतिविधि गर्न निषेध गरिएको छ । देउसीभैलो सञ्चालन गर्दा स्थानीय तह र नेपाल प्रहरीसँग समन्वय गर्न प्रशासनले आग्रह गरेको छ ।
