काठमाडौं — कर्णाली याक्सलाई ३९ रनले पराजित गरेपछि सुदूरपश्चिम रोयल्सका खेलाडी विलियम बोसिस्टोले प्रतियोगिताको पहिलो खेलमा भएका कमजोरी सच्याउँदा टोलीले जित हात पारेको बताएका छन् । उनले यो जितले टोलीको आत्मविश्वास बढाएको बताए ।
‘आशा छ, हाम्रो यो जितको लय आगामी खेलमा पनि कायम रहनेछ । प्रतियोगिताको सुरुवाती खेलमा हामीले केही गल्ती गरेका थियौँ । ती गल्ती पहिचान गरेर सुधार गर्ने प्रयास गर्यौँ । त्यसको नतिजा अहिले देखिएको छ,’ उनले भने ।
ब्याटिङ र बलिङ दुवैमा आफूले सक्दो योगदान दिएको बताउँदै बोसिस्टोले व्यक्तिगत प्रदर्शनभन्दा टोलीको जित महत्त्वपूर्ण रहेको बताए । सुदूरपश्चिमका स्पिनरले उत्कृष्ट बलिङ गरेको भन्दै उनले उनीहरूको प्रशंसा गरे ।
‘आज मेरो प्रदर्शन ठिकै रह्यो । तर, हाम्रा स्पिनरहरूले निकै राम्रो बलिङ गरे । उनीहरूको प्रदर्शनले नै खेल हाम्रो पक्षमा पार्न महत्त्वपूर्ण भूमिका खेल्यो,’ उनले भने ।
कर्णालीका डेभिड मिलरले खेलको अन्त्यतिर गरेको आक्रामक ब्याटिङको पनि उनले प्रशंसा गरे । पिचको अवस्था बुझेर लय समातेपछि मिलर खतरनाक बन्न सक्ने बोसिस्टोले बताए । यो जितपछि सुदूरपश्चिमको लय बलियो बनेको र आगामी खेलमा पनि यही प्रदर्शन दोहोर्याउने लक्ष्य रहेको उनले बताए ।
