काठमाडौं । नेकपा एमालेका उपाध्यक्ष रामबहादुर थापा ‘बादल’ले पश्चिमा शक्तिहरूको स्वार्थअनुसार काम नगरे वर्तमान सरकार ढल्न सक्ने चेतावनी दिएका छन्।
शुक्रबार झापाको दमकमा एमाले दमक नगर कमिटीले आयोजना गरेको कार्यक्रममा बोल्दै उनले सरकारले ती शक्तिहरूको चाहना पूरा नगरे उनीहरूले नै सरकार गिराइदिने दाबी गरे।
बादलले विगततर्फ फर्किँदै एमाले, नेपाली कांग्रेस र तत्कालीन माओवादीसहितका दलले पश्चिमा स्वार्थ पूरा नगर्दा ती दलमाथि आक्रमण भएको र पार्टी कार्यालय तथा नेताहरूका घर ध्वस्त पारिएको बताए। उनको भनाइमा ती शक्तिहरूले आफ्नो स्वार्थ पूरा गर्न यस्तो कदम चालेका थिए।
उनले इतिहासको उदाहरण दिँदै पश्चिमा शक्तिहरूले नै सद्दाम हुसेन र ओसामा बिन लादेनलाई अगाडि बढाएको र पछि उनीहरू बाधक बन्न थालेपछि नष्ट पारेको समेत उल्लेख गरे।
बादलको यो टिप्पणी यस्तो बेला आएको हो, जतिबेला प्रधानमन्त्री बालेन शाह नेतृत्वको सरकार र उसका कामकारबाहीबारे राजनीतिक वृत्तमा बहस चुलिँदै गएको छ। उनले सरकारलाई बाह्य दबाबबाट जोगिन सचेत रहनुपर्ने सन्देश दिएको बुझिएको छ।
