चालु आर्थिक वर्षको पहिलो तीन महिनामा मापदण्डविपरीत खाद्य पदार्थ उत्पादन र बिक्री गरेको आरोपमा ६४ वटा खाद्य उद्योग तथा व्यवसायीविरुद्ध मुद्दा दायर भएको छ। मुद्दा चलाइएकामध्ये चाउचाउ उत्पादक सीजी फुड्स पनि रहेको छ।
स्वास्थ्य तथा खाद्य स्वच्छता विकास मन्त्रालय मातहतको खाद्य प्रविधि तथा गुण नियन्त्रण विभागका अनुसार गत साउनदेखि असोजसम्मको अवधिमा भेटिएका कैफियतका आधारमा कारबाही प्रक्रिया अघि बढाइएको हो। विभाग र मातहतका कार्यालयले खाद्य बजार, उद्योग, होटल तथा रेस्टुरेन्टको अनुगमन र निरीक्षण गर्दै आएका छन्।
अनुगमनका क्रममा खाद्य निरीक्षण अधिकारीले संकलन गरेका नमुना प्रयोगशालामा जाँच गर्दा मापदण्डविपरीत देखिएका खाद्य पदार्थका उत्पादक र व्यवसायीलाई खाद्य स्वच्छता तथा गुणस्तर ऐन, २०८१ बमोजिम कारबाही गरिएको विभागले जनाएको छ। मानव स्वास्थ्यको सुरक्षा र उपभोक्ताको हित संरक्षणका लागि ऐनले दिएको व्यवस्थाअनुसार मुद्दा दायर गरिएको हो।
कैफियत भेटिएका व्यवसायीविरुद्ध सम्बन्धित जिल्ला अदालत तथा प्रमुख जिल्ला अधिकारीसमक्ष मुद्दा दायर गरिएको छ। विभागले खाद्य पदार्थको गुणस्तर र स्वच्छतामाथि निगरानी जारी राख्ने जनाएको छ। उपभोक्ताले खरिद गर्ने खाद्य पदार्थ सुरक्षित र मापदण्डअनुरूप हुनुपर्नेमा विभागको जोड छ।
