काठमाडौँ । नेपालकै पहिलो आधुनिक सडक सुरुङमार्ग (नागढुंगा–सिस्नेखोला) मा यात्रा गर्न आवश्यक पर्ने ‘एन–ट्याग’ अब सानिमा बैंकबाट सहजै लिन सकिने भएको छ । बैंकले एक प्रेस विज्ञप्ति जारी गर्दै देशभर फैलिएका आफ्ना शाखाहरूमार्फत यो सुविधा उपलब्ध गराएको जानकारी दिएको हो ।
सडक बोर्ड नेपालद्वारा सञ्चालित यस सुरुङमार्गमा विद्युतीय प्रणालीमार्फत टोल (शुल्क) संकलन गरिन्छ । सवारीसाधनको अगाडिको सिसामा टाँसिने आरएफआईडी प्रविधिमा आधारित एन–ट्यागलाई प्रवेश र निकास गेटमा जडान गरिएको मेसिनले स्वतः पहिचान गर्छ ।
त्यसपछि ट्यागबाटै स्वतः रकम काटिएर गेट खुल्ने हुँदा यात्रुहरूले लाइनमा बस्नु नपर्ने र छिटो तथा झन्झटरहित यात्रा गर्न सक्ने बैंकले जनाएको छ ।
सवारीधनीहरूले बैंकको जुनसुकै शाखामा गएर यो ट्याग लिन सक्नेछन् । ट्यागमा रकम सकिएपछि ई–सेवा, फोनपे हब तथा सानिमा बैंकको मोबाइल बैंकिङ सेवाबाट सजिलै रिचार्ज गर्न सकिने व्यवस्था मिलाइएको छ । यो सेवा काठमाडौँ उपत्यकाभित्र मात्र नभई देशभरका शाखामार्फत उपलब्ध गराइएकाले उपत्यकाबाहिरका सवारीधनीले पनि आफ्नै नजिकको शाखाबाट ट्याग जडान गर्न सक्नेछन् ।
सानिमा बैंकका प्रमुख निक्षेप अधिकृत हेमराज संज्यालले नागढुंगा सुरुङमार्गजस्तो राष्ट्रिय पूर्वाधारमा डिजिटल भुक्तानीको सहजीकरण गर्न पाउनु बैंकका लागि गौरवको विषय भएको बताए ।
