काठमाडौंमा बिहीबार आयोजित पत्रकार सम्मेलनमा अर्थमन्त्री डा. स्वर्णिम वाग्लेले नेपाल पूर्वाधार सम्मेलनले देशमा लगानीको वास्तविक वातावरण कस्तो छ भन्ने देखाउन महत्त्वपूर्ण भूमिका खेल्ने बताएका छन्। उनका अनुसार सम्मेलन भाषण सुन्ने वा विदेशी वक्ता मात्र बोलाउने कार्यक्रम होइन, यसले ठोस नतिजा दिनुपर्छ।
अर्थमन्त्री वाग्लेले सरकारको २१ खर्ब रुपैयाँको बजेटले मात्रै अर्थतन्त्रलाई गति दिन नसकिने धारणा राखे। ७० खर्ब रुपैयाँको अर्थतन्त्रलाई चलायमान बनाउन निजी क्षेत्रसँग हातेमालो गरेर अघि बढ्नुपर्ने उनको भनाइ छ। सरकारले सम्मेलनपछिको अवस्थालाई समेत ध्यानमा राखेर काम गरिरहेको उनले जानकारी दिए।
सम्मेलनअघि लगानीमैत्री कानुनी वातावरण तयार पार्ने काम तीव्र गतिमा भइरहेको छ। कानूनमन्त्री सोविता गौतमले साउन १ गतेदेखि हालसम्म ५४ भन्दा बढी विधेयक मन्त्रिपरिषद्बाट स्वीकृत भई अघि बढिसकेको बताइन्। सम्मेलनअघि ५९ वटा कानुन संशोधन गर्नुपर्ने अवस्था रहेको उनको भनाइ छ।
लगानीका लागि आवश्यक कानुनी तथा नीतिगत व्यवस्था सम्मेलनअघि नै अन्तिम रूप दिइने कानूनमन्त्री गौतमले बताइन्।
