काठमाडौँको गोकर्णेश्वरमा बिहीबार राति प्रहरीले गोली चलाएर डलर ठगीमा संलग्न एक जनालाई नियन्त्रणमा लिएको छ।
गोकर्णेश्वर नगरपालिका वडा नम्बर ३ स्थित गाम्चामा भएको घटनामा सुजन तामाङ पक्राउ परेका हुन्। उनलाई नियन्त्रणमा लिने क्रममा दायाँ खुट्टामा गोली लागेको जिल्ला प्रहरी परिसर काठमाडौँका एसएसपी दिलिप घिमिरेले जानकारी दिए।
प्रहरीको अनुसन्धानअनुसार तामाङले सस्तो मूल्यमा डलर साटिदिने प्रलोभन देखाएर मानिसहरूलाई लुट्ने गरेका थिए। उनलाई पक्राउ गर्न पुगेको प्रहरी टोलीले गोली चलाउनुपरेको हो।
घटनापछि घाइते तामाङलाई उपचारका लागि लगिएको छ भने घटनाबारे थप अनुसन्धान भइरहेको प्रहरीले जनाएको छ। प्रहरीले ठगीमा संलग्न अन्य व्यक्तिबारे पनि अनुसन्धान गरिरहेको छ।
