चितवन । राष्ट्रिय स्वतन्त्र पार्टीका सभापति रवि लामिछानेले नारायणी नदीले पुर्याइरहेको कटानबाट चितवनको बजार क्षेत्रलाई जोगाउन तत्काल र दीर्घकालीन दुवै खालका योजना बनाएर अघि बढ्नुपर्ने बताएका छन् ।
नारायणी किनारमा पुगेर कटानको अवस्था आफैँ हेरेपछि उनले उद्योग वाणिज्य सङ्घ चितवनमा सरोकारवालासँग छलफल गरे । छलफलमा उनले नागरिकको ज्यान, बजारको अस्तित्व र व्यवसायीको सम्पत्ति बचाउनु अहिलेको मुख्य जिम्मेवारी भएको बताए । जोखिमबारे सङ्घले जानकारी गराएलगत्तै सम्बन्धित निकायलाई खबर गरी अध्ययन तथा योजना बनाउन टोली खटाएको उनको भनाइ थियो ।
सभापति लामिछानेले तत्काल गर्नुपर्ने काम र दीर्घकालीन समाधान दुवैलाई सँगै हेरेर योजना बनाउनुपर्नेमा जोड दिए । प्राविधिक अध्ययनका आधारमा भविष्यमा बजार नै स्थानान्तरण गर्नुपर्ने अवस्था आउनसक्ने उनले औँल्याए । त्यस्तो अवस्था आए सबै सरोकारवाला एकमत भएर निर्णयमा सहभागी हुनुपर्ने उनको भनाइ थियो ।
उनले भने, “जनता जोगाउनका लागि बजेट दोस्रो कुरा हो । जनतालाई कसरी जोगाउन सकिन्छ भन्ने नै पहिलो प्राथमिकता हो ।” नागरिकको जिउ र व्यवसायीको सम्पत्ति जोगाउन तत्काल के गर्न सकिन्छ र दीर्घकालीन रूपमा के गर्नुपर्छ भन्नेबारे स्पष्ट योजना आवश्यक रहेको उनले बताए ।
आफ्नो निर्वाचन क्षेत्र भएकै कारण चितवनलाई विशेष प्राथमिकता दिनुपर्ने मान्यता आफूले नराखेको उनले स्पष्ट पारे । बाढीपहिरोले पुर्याएको क्षति र आवश्यकताका आधारमा राज्यले स्रोत परिचालन गर्नुपर्ने उनको भनाइ थियो । कर्णाली, सुदूरपश्चिम र मधेसलगायत क्षेत्रमा बाढीबाट प्रभावित नागरिकको समस्या उत्तिकै महत्त्वपूर्ण रहेको उनले बताए ।
चितवनको समस्या पनि अन्य प्रभावित क्षेत्रसरह आवश्यकताका आधारमा सम्बोधन हुने उनले बताए । अध्ययन लगभग तयार भइसकेको जानकारी दिँदै उनले योजनाका लागि स्रोत सुनिश्चित गर्न पहल गर्ने प्रतिबद्धता जनाए । सङ्घका अध्यक्ष चिरञ्जीवी सुवेदीले लामिछानेले सुरुदेखि नै पहल गर्दै आएको बताए ।
