दक्षिण अमेरिकी मुलुक पाराग्वेमा बैङ्किङ सङ्कट चुलिँदै गएपछि राष्ट्रपति सान्टियागो पेनाले राजीनामा घोषणा गरेका छन्। करिब ३० लाख निक्षेपकर्ताको बचत रकम रोकिएको घटनाले जनआक्रोश बढेको थियो भने संसद्मा उनीविरुद्ध महाभियोगको दबाब पनि चुलिएको थियो।
पाराग्वेको केन्द्रीय बैङ्कले गम्भीर पुँजी अभाव देखिएको भन्दै राष्ट्रपतिसँग सम्बन्धित युएनो बैङ्क नियन्त्रणमा लिएको थियो। त्यसपछि पेन्सनभोगीसहित लाखौँ निक्षेपकर्ताले आफ्नो रकम निकाल्न पाएनन्। रकम फिर्ता गर्न माग गर्दै राजधानी असुनसियोनमा हजारौँ नागरिकले संसद् भवनबाहिर प्रदर्शन गरे। यसअघि भएको प्रदर्शनमा प्रहरीसँग झडप हुँदा अश्रुग्यास र पानीको फोहोरा प्रयोग गरिएको थियो।
बैङ्कमा राष्ट्रपतिको स्वार्थको द्वन्द्व र पदको दुरुपयोग भएको आरोप लगाउँदै सांसदहरूले उनीविरुद्ध सर्वसम्मतिले महाभियोग प्रक्रिया अघि बढाएका हुन्। राष्ट्रपतिले सामाजिक सञ्जालमार्फत जनतासँग माफी माग्दै निक्षेपकर्ताको बचत सुरक्षित राख्नु आफ्नो प्राथमिकता भएको बताएका छन्।
विवाद समाधानका लागि केन्द्रीय बैङ्कका अध्यक्ष कार्लोस कार्भालोले राजीनामा दिएका छन् भने निक्षेप फिर्ताका लागि पाँच दिनको समयसीमा तोकिएको छ। तर पनि जनआक्रोश मत्थर भएको छैन। संसद्ले शुक्रबारदेखि महाभियोग सुनुवाइ गर्ने तयारी गरेको छ।
संसद्ले राजीनामा स्वीकृत नगरेसम्म पेना पदमै रहनेछन्। राष्ट्रपति पद रिक्त भएमा उपराष्ट्रपति पेड्रो एलियानाले नेतृत्व सम्हाल्नेछन्।
