ब्रिस्बेन । अष्ट्रेलियाको गोल्ड कोस्टमा रहेको नेपाली क्रिकेट क्लबले क्वीन्सल्यान्डको प्रतिष्ठित प्रतियोगितामा ऐतिहासिक उपाधि हात पारेको छ। गोल्ड कोस्ट नेपाली क्रिकेट क्लबले आइतबार ब्रिस्बेनको कालिङ्गा पार्क–३ मा भएको फाइनलमा ब्रिस्बेन युनाइटेडलाई ९ रनले हराउँदै जीवाईडब्ल्यू फाइनान्स क्यूएनसीए ग्रेड ‘बी’ टी–२० च्याम्पियनसिप २०२६ जितेको हो।
टसपछि पहिले ब्याटिङ गरेको गोल्ड कोस्टले २० ओभरमा पाँच विकेटको क्षतिमा १६१ रन बनाएको थियो। जवाफमा ब्रिस्बेन युनाइटेडले निर्धारित ओभरमा ६ विकेट गुमाएर १५२ रन मात्र बनाउन सक्यो।
लिग चरणका १० मध्ये ९ खेल जितेर अंकतालिकाको शीर्ष स्थानमा रहेको गोल्ड कोस्ट ब्रिस्बेन नेपाली क्रिकेट लिगको फाइनलमा पुग्ने गोल्ड कोस्टको पहिलो क्लब बनेको थियो। पहिलो पटक फाइनल खेलेको क्लबले नै उपाधि जित्दै इतिहास रचेको छ।
गोल्ड कोस्टका लागि अमृत पाण्डेले ४० बलमा ४० रन बनाए भने दिपेन गुरुङले २६ बलमा २९ रन जोडे। अन्तिम ओभरमा सरोज रिजाल क्षेत्रीले पाँच छक्का र एक चौकासहित १२ बलमा अविजित ३८ रन बनाएर टोलीको जित पक्का गरे। विनय खड्का पाँच बलमा सात रनसहित अविजित रहे।
ब्याटिङमा ४० रन बनाएका अमृतले फिल्डिङमा चार महत्त्वपूर्ण क्याचसमेत लिए। उनी फाइनलको उत्कृष्ट खेलाडी घोषित भए।
गोल्ड कोस्टका राजन खड्गी प्रतियोगिताको उत्कृष्ट खेलाडी र उत्कृष्ट बलर दुवै घोषित भए। उनले प्रतियोगिताभर ४५.६७ को औसतमा ४११ रन बनाउनुका साथै ९.८८ को औसतमा २४ विकेट लिए। उनी टोलीका सर्वाधिक रन बनाउने र विकेट लिने खेलाडीसमेत बने।
उज्ज्वल कोइरालाको कप्तानीमा खेलेको गोल्ड कोस्टका उपकप्तान रोडिन महर्जनले १०.७३ को औसतमा २२ विकेट लिए। ब्याटिङतर्फ अमित पोखरेलले २६४, अभिनव रिजालले १९७, कृष्ण न्यौपानेले १७७ र दिपेन गुरुङले १२२ रन बनाए। अभिनवले बलिङमा पाँच विकेट लिए भने सरोज रिजाल क्षेत्रीले १३ र सुदिन आचार्यले १० विकेट लिए।
अमित चौलागाईं, पारस पल्ली, प्रसुन श्रेष्ठ र विनय खड्काले पनि टोलीको उपाधि यात्रामा योगदान दिए। टोली व्यवस्थापक मिराज पौडेल थिए।
क्लबले प्रतियोगिताभर साथ दिने खेलाडीका परिवार, साथीभाइ र गोल्ड कोस्टको नेपाली समुदायप्रति आभार व्यक्त गरेको छ। फाइनल हेर्न ब्रिस्बेन पुगेका समर्थकलाई पनि क्लबले धन्यवाद दिएको छ।
