चीनको जिङ्सुमा सम्पन्न बेल्ट एन्ड रोड सिरिजमा नेपालको यू–१९ महिला क्रिकेट टोलीले उपाधि जितेको छ। आइतबार नेपाल र आयोजक चीनबीच हुनुपर्ने फाइनल खेल वर्षाका कारण हुन सकेन। खेल रद्द भएपछि समूह चरणको प्रदर्शनका आधारमा नेपाली टोलीलाई च्याम्पियन घोषणा गरिएको हो।
यो सिरिज आगामी आईसीसी यू–१९ महिला ट्वान्टी–२० विश्वकपको तयारीका रूपमा आयोजना गरिएको थियो। प्रतियोगिताभर नेपाली टोलीले सन्तुलित र आत्मविश्वासपूर्ण खेल प्रस्तुत गर्यो। कुल ६ खेलमध्ये नेपालले ४ खेलमा जित निकाल्यो भने बाँकी २ खेल वर्षाका कारण रद्द भए। कुनै पनि खेलमा पराजय नभोगेको टोली समूह चरणको समग्र प्रदर्शनका आधारमा उपाधि हात पार्न सफल भयो।
वर्षाका कारण फाइनल खेल्न नपाए पनि उपाधिले नेपाली महिला क्रिकेटको उदीयमान पुस्तालाई ठूलो हौसला दिएको छ। विश्वकपको तयारीमा रहेको टोलीका लागि यो सफलता आत्मविश्वास बढाउने कोशेढुङ्गा सावित हुने अपेक्षा गरिएको छ।
