भक्तपुर — बागमती प्रदेशमा नेपाल भाषा र तामाङ भाषालाई सरकारी कामकाजको भाषाका रूपमा प्रयोग गर्ने कानुनी व्यवस्था गरिएको छ। प्रदेशका मुख्यमन्त्री किरण थापा मगरले भक्तपुरमा आयोजित एक कार्यक्रममा सो जानकारी दिएका हुन्।
राष्ट्रिय विभूति शङ्खधर साख्वाः प्रतिष्ठानले नेपाल संवत् ११४७ को नयाँ वर्षको अवसरमा आयोजना गरेको कार्यक्रममा बोल्दै मुख्यमन्त्री थापा मगरले प्रदेश सरकारले भाषा, साहित्य र संस्कृतिको संरक्षण तथा प्रवर्द्धनलाई प्राथमिकतामा राखेको बताए। उनका अनुसार नेपाल भाषा र तामाङ भाषालाई सरकारी कामकाजमा प्रयोग गर्ने गरी ऐन निर्माण भई कार्यान्वयनको प्रक्रिया अघि बढाइएको छ।
बहुभाषिक र बहुजातीय मुलुकमा प्रदेशको भाषिक तथा सांस्कृतिक पहिचानलाई सरकारी मान्यता दिनु सङ्घीयताको महत्त्वपूर्ण उपलब्धि भएको उनको भनाइ छ। प्रदेश सरकारले भाषा, साहित्य, कला र संस्कृतिको उत्थानका लागि हरेक वर्ष बजेट विनियोजन गर्दै आएको उनले बताए।
सोही क्रममा शङ्खधर साख्वाः प्रतिष्ठानको सङ्ग्रहालय निर्माण, संरक्षण र विकासका लागि समेत प्रदेश सरकारले बजेट छुट्याएको छ। प्रदेशका १३ वटै जिल्लामा शङ्खधर साख्वाको योगदान र पहिचान स्थापित गर्नुपर्ने उल्लेख गर्दै उनले यस वर्ष दोलखा जिल्लामा प्रतिष्ठान निर्माणका लागि समेत बजेट विनियोजन गरिएको जानकारी दिए।
शङ्खधर साख्वाःले ११४७ वर्षअघि ऋणमा डुबेका सर्वसाधारणलाई ऋणमुक्त गराएर परोपकार र सामाजिक सेवाको अनुपम उदाहरण प्रस्तुत गरेको मुख्यमन्त्री थापा मगरले बताए। उनका अनुसार सोही महान् योगदानका कारण नेपाल संवत् मौलिक राष्ट्रिय पहिचान र गौरवको प्रतीक बनेको छ।
