वीरगञ्ज — तिहार र आगामी छठ पर्व नजिकिँदै गर्दा पर्सा जिल्लामा पटाकाको प्रयोग, ओसारपसार र बिक्रीवितरणमाथि प्रहरीले कडाइ गरेको छ। जिल्लाभर विशेष गस्ती र निगरानी बढाइएको जिल्ला प्रहरी कार्यालयले जनाएको छ।
पर्साको पकाहाँ मैनपुर गाउँपालिका–२ मधुबनीमा सोमबार पटाकाको छर्रा लागेर पाँच वर्षीय बालक कुन्दन सहनीको ज्यान गएपछि प्रहरी प्रशासनले नियन्त्रणको काम थप सक्रिय बनाएको हो। चाडपर्वको बेला गाउँबस्ती र बजार क्षेत्रमा पटाका सहजै पाइने अवस्था बनेपछि प्रहरीले सीमा क्षेत्रदेखि ग्रामीण बस्तीसम्म निगरानी विस्तार गरेको छ।
जिल्ला प्रहरी कार्यालयका नायब उपरीक्षक चक्रबहादुर मल्लका अनुसार सीमावर्ती नाकाबाट अवैध रूपमा भित्रिने पटाका तथा विस्फोटक पदार्थको ओसारपसार, बिक्री र प्रयोग रोक्न विशेष टोली परिचालन गरिएको छ। चाडपर्वको समयमा यस्ता सामग्रीको प्रयोगबाट हुने दुर्घटना रोक्न प्रहरीले निगरानी संयन्त्रलाई सक्रिय बनाएको उनले बताए।
प्रहरीले यसअघि पनि चाडपर्वका बेला पटाका र विस्फोटकजन्य सामग्रीबाट टाढा रहन पटक–पटक आग्रह गर्दै आएको थियो। तिहार र छठको अवसरमा पटाका पड्काउने क्रम बढ्न थालेपछि प्रहरीले सचेतना र कारबाही दुवैलाई सँगै अघि बढाएको छ।
