भक्तपुर — सभामुख डोलप्रसाद अर्यालले सरकारी कामकाजमा नेपाल संवतको प्रयोग थप विस्तार गर्नुपर्ने बताएका छन्। नेपाल संवत ११४७ नयाँ वर्षको अवसरमा मंगलबार भक्तपुरमा राष्ट्रिय विभूति शङ्खधर साख्वाः प्रतिष्ठानले आयोजना गरेको कार्यक्रममा बोल्दै उनले सार्वजनिक अभिलेख, शिक्षाको क्षेत्र र डिजिटल प्रणालीमा समेत नेपाल संवतलाई प्रयोगमा ल्याउनुपर्ने धारणा राखे।
नेपाल संवतलाई राष्ट्रिय मान्यता दिनु ठूलो उपलब्धि भए पनि त्यसलाई व्यवहारमा उतार्न स्पष्ट नीति, पर्याप्त बजेट र ठोस कार्ययोजना आवश्यक पर्ने उनको भनाइ छ। उनले नेपाल संवत केवल वर्ष गन्ने माध्यम नभई नेपालको ऐतिहासिक सभ्यता, मौलिक संस्कृति र राष्ट्रिय पहिचानको जीवन्त प्रतीक भएको उल्लेख गरे।
सभामुख अर्यालले राष्ट्रिय विभूति शङ्खधर साख्वाःले आफ्नो सम्पत्ति जनहितमा समर्पण गरेर ऋणमा डुबेका सर्वसाधारणलाई मुक्त गराएको योगदान सामाजिक न्याय र परोपकारको अनुपम उदाहरण भएको बताए। उनको जीवनले व्यक्तिगत स्वार्थभन्दा माथि उठेर सार्वजनिक हितमा काम गर्नुपर्ने सन्देश दिएको उनले उल्लेख गरे।
यो मूल्यलाई आजको राजनीति, प्रशासन र सामाजिक जीवनमा आत्मसात् गर्नुपर्नेमा जोड दिँदै उनले नेपाल संवत आन्दोलनले भाषा, लिपि र संस्कृतिको संरक्षणसँगै लोकतान्त्रिक चेतना अभिवृद्धिमा पनि महत्वपूर्ण योगदान पुर्याएको बताए। आन्दोलनका अग्रज र अभियन्ताहरूको योगदानलाई राज्यले उचित सम्मान गर्नुपर्ने उनको भनाइ छ।
साथै, शङ्खधर साख्वाःको योगदानलाई राष्ट्रिय तथा अन्तर्राष्ट्रिय स्तरमा चिनाउन र नेपाल भाषा तथा लिपिको संरक्षण गर्न राज्यले प्रभावकारी नीति र कार्यक्रम ल्याउनुपर्ने उनले बताए।
