काठमाडौं । आगामी यू–१९ महिला टी–२० विश्वकपको तयारीस्वरूप भारतमा अभ्यास शृङ्खला खेल्न जाने नेपाली युवा महिला क्रिकेट टोलीलाई मंगलबार बिदाइ गरिएको छ । नेपाल क्रिकेट संघ (क्यान) ले नोभेम्बर १२ देखि २२ सम्म भारतको बैंगलोरमा हुने ‘नेपाल यू–१९ वुमन्स प्राक्टिस टी–२० सिरिज’ का लागि १५ सदस्यीय टोली घोषणा गरेको हो ।
टोलीको नेतृत्व सोनी पाख्रिनले गर्नेछिन् । टोलीमा रचना कुमारी चौधरी, रिया शर्मा, प्रिन्सा राना मगर, टिका साह, अन्जिला पाठक, साक्षी यादव, सावित्री घामी, मनीषा चौधरी, आशिका कुमारी महरा, आशा चौधरी, प्रथा श्रेष्ठ, ज्योत्स्निका मरासिनी, पूर्णिमा राजवंशी र तिर्सना विश्वकर्मा रहेका छन् ।
शृङ्खलामा नेपालसहित भारतका यू–१९ महिला ‘ए’ र ‘बी’ टोली सहभागी हुनेछन् । नेपालले नोभेम्बर १२ मा भारत ‘बी’ विरुद्ध खेल्दै शृङ्खलाको सुरुआत गर्नेछ । त्यसपछि नोभेम्बर १४ मा भारत ‘ए’, नोभेम्बर १८ मा भारत ‘बी’ र नोभेम्बर २० मा भारत ‘ए’ सँग खेल्नेछ । फाइनल नोभेम्बर २२ मा हुनेछ । सबै खेल बैंगलोरस्थित भारतीय क्रिकेट बोर्डको सेन्टर अफ एक्सिलेन्समा हुनेछन् ।
नेपाल र बंगलादेशले संयुक्त रूपमा सन् २०२७ को जनवरी २१ देखि फेब्रुअरी ६ सम्म यू–१९ महिला टी–२० विश्वकप आयोजना गर्दैछन् । नेपालले पहिलोपटक यो विश्वकप आयोजना गर्न लागेको हो । समूह ‘ए’ मा नेपालसँगै साविक विजेता भारत, आयरल्यान्ड र वेस्ट इन्डिज छन् । त्यसैले बलिया भारतीय युवा टोलीसँगको यो शृङ्खला विश्वकपअघिको महत्त्वपूर्ण अभ्यास हुने अपेक्षा गरिएको छ ।
यसअघि नेपाली टोलीले नोभेम्बर ३ देखि ८ सम्म चीनमा भएको बेल्ट एन्ड रोड यू–१९ गल्र्स टी–२० आई प्रतियोगितामा खेलेको थियो । त्यहाँ हङकङविरुद्धको खेलमा नेपालले ९२ रनको जित निकाल्दा कप्तान पाख्रिनले ४४ रन बनाएकी थिइन् ।
