दाङ — बबई नदीको किनारमा पछिल्लो चरणमा १५ किलोमिटर लामो तटबन्ध निर्माण सम्पन्न भएको छ। लमहीमा रहेको सिँचाइ तथा जलस्रोत व्यवस्थापन आयोजनाले उक्त काम पूरा गरेको हो।
एक सय ३२ दशमलव आठ किलोमिटर लामो बबई नदीको किनारमा तटबन्ध बनेपछि नदीले बगाएर लगेको र बाढीको जोखिममा परेको ४६८ हेक्टर खेतीयोग्य जमिन उकास भएको आयोजनाका सूचना अधिकारी खुमानन्द वलीले जानकारी दिए। उनका अनुसार तटबन्धले नदी किनारका बस्ती र खेतबारीलाई बाढीबाट जोगाउन सहयोग पुग्नेछ।
आयोजनाले विभिन्न स्थानमा तटबन्ध तथा सिञ्चित क्षेत्र संरक्षणका ठेक्का सम्पन्न गरेको छ। दङ्गीशरण–१ र ४ मा एक करोड २४ लाख ८४ हजार ६६८ रुपैयाँ, तुलसीपुर–१४ मा दुई करोड ४७ लाख ३८ हजार ५९ रुपैयाँ, दङ्गीशरण–१ मा ७४ लाख ८१ हजार ९४४ रुपैयाँ, घोराही–८ मा ४५ लाख सात हजार ४१६ रुपैयाँ र दङ्गीशरण–१ को रहरीपुरमा १४ लाख ९३ हजार ६२० रुपैयाँका काम सकिएका छन्।
यसैगरी तुलसीपुर–२ को एकली खोलामा ९६ लाख ६१ हजार ५८९ रुपैयाँको काम पनि सम्पन्न भएको छ। तटबन्ध निर्माणपछि स्थानीय बासिन्दालाई बाढीको डर कम भएको र खेतीपाती गर्न सहज भएको आयोजनाले जनाएको छ।
