सप्तकोशी नदीमा यात्रु बोकेर हिँडेको जेटबोट दुर्घटनामा पर्दा तीन जनाको ज्यान गएको छ। भोजपुरबाट चतरातर्फ आउँदै गरेको बोट अरुण र दूधकोशी मिसिने त्रिवेणी क्षेत्र नजिकै पुग्दा इञ्जिनले काम गर्न छाडेको थियो। बग्दै गएको बोट दुर्घटनामा परेको प्रहरीले जनाएको छ।
दुर्घटनामा एक बालिका, एक महिला र एक पुरुषको मृत्यु भएको धनकुटा प्रहरी प्रमुख नारायण रञ्जितकारले जानकारी दिए। मृतकहरूको नाम ठेगाना भने अहिलेसम्म खुल्न सकेको छैन।
बोटमा १६ जना सवार रहेको बताइएको छ। तीमध्ये १२ जनाले मात्र टिकट लिएको खुलेको छ। दुर्घटनापछि पाँच जना सकुशल घर फर्किसकेका छन् भने एक जना घाइतेको चतरा अस्पतालमा उपचार भइरहेको छ।
बोटका चालकलाई अहिले सुनसरी प्रहरीले नियन्त्रणमा लिएको छ। मृतकको पहिचान र दुर्घटनाको कारणबारे थप अनुसन्धान भइरहेको प्रहरीले जनाएको छ।
असारदेखि बन्द रहेको जेटबोट सेवा कात्तिक १ गतेदेखि मात्र पुनः सुरु भएको थियो। सेवा सुरु भएको केही दिनमै भएको यो दुर्घटनाले नदी यात्राको सुरक्षामाथि प्रश्न उठाएको छ।
