कञ्चनपुरमा ट्राफिक नियम उल्लङ्घन गर्ने तीन हजार ९०३ सवारीसाधन कारबाहीमा परेका छन्। सुदूरपश्चिम प्रदेश प्रहरी कार्यालयका प्रहरी वरिष्ठ उपरीक्षक पदमबहादुर विष्टका अनुसार एक महिनाको अवधिमा ती सवारीसाधनबाट ३३ लाख ८६ हजार ५०० रुपैयाँ राजस्व संकलन भएको छ।
असोज महिनामा सुदूरपश्चिममा २३५ वटा सवारी दुर्घटना भएका थिए। ती दुर्घटनामा १२ जनाको मृत्यु भयो भने ३६३ जना घाइते भए। दुर्घटनामा ३२१ सवारीसाधन संलग्न थिए। तथ्यांकअनुसार २०८ वटा दुर्घटना चालकको गल्तीका कारण भएका थिए भने छ वटा मादक पदार्थ सेवनका कारण भएका थिए। सवारीसाधनका कारण नौ, यात्रुका कारण एक, पैदलयात्रीका कारण दुई, चौपायाका कारण पाँच र सडकका कारण चार वटा दुर्घटना भएको प्रहरीले जनाएको छ।
विष्टले प्रहरीले सवारीको यान्त्रिक परीक्षण गर्ने कार्यक्रम सुरु गरेको जानकारी दिए। सोही अवधिमा २४ जनालाई नियन्त्रणमा लिएर दुई करोड २० लाख छ हजार रुपैयाँ बराबरको भन्सार छलीका सामान बरामद गरिएको छ। प्राकृतिक सम्पदा दोहनमा संलग्न पाँच जना र २८ वटा सवारीसाधन नियन्त्रणमा लिई तीन लाख ३४ हजार ९०० रुपैयाँ जरिवाना असुल गरिएको छ। यस प्रकरणमा नौ जना पक्राउ परेका छन्। अवैध वन पैदावार चोरीमा ६२ क्युफिट काठ बरामद गरी तीन लाख १५ हजार रुपैयाँ राजस्व उठेको छ भने अवैध पशुपन्छी नियन्त्रणबाट ११ लाख १२ हजार ३०० रुपैयाँ राजस्व संकलन भएको छ।
