काठमाडौं — चालु आर्थिक वर्ष सुरु भएयता निजामती सेवाबाट बाहिरिने कर्मचारीको सङ्ख्या उल्लेख्य देखिएको छ। साउन १ गतेदेखि अहिलेसम्म ४ सचिवसहित ४६४ जनाले पद छाडेका छन्। राष्ट्रिय किताबखाना (निजामती) ले उपलब्ध गराएको विवरणमा यस्तो सङ्ख्या देखिएको हो।
किताबखानाका निर्देशक तथा सूचना अधिकारी सुदन ख्वाखली श्रेष्ठका अनुसार छाड्नेमध्ये २०७ जना राजपत्राङ्कित र २५७ जना राजपत्र अनङ्कित तहका छन्। राजपत्राङ्कित समूहमा ४ सचिव, ३३ सहसचिव, ७२ उपसचिव र ९८ शाखा अधिकृत छन्। अनङ्कित समूहमा १३७ जना खरदार तथा नायब सुब्बा तहका र १२० जना श्रेणीविहीन कर्मचारी परेका छन्।
यो लहरसँगै प्रतिनिधि सभामा दर्ता भएको निजामती कर्मचारी विधेयकको प्रस्ताव जोडिएको छ। विधेयकमा कार्यान्वयनमा आएपछि ३० वर्ष सेवा पूरा गरेका वा ५५ वर्ष उमेर पुगेका कर्मचारीले पद छाड्नुपर्ने व्यवस्था राखिएको छ। उक्त व्यवस्था आउनुअघि नै धेरै कर्मचारीले बिदाइ रोजेको किताबखानाको बुझाइ छ। विधेयकको प्रस्ताव सार्वजनिक भएपछि कर्मचारीहरूले धमाधम राजीनामा दिएका हुन्।
तर, राजीनामा पत्रमा भने धेरैले घरायसी कारण उल्लेख गरेका छन्। किताबखानाका अनुसार सबै राजीनामा सरकारबाट स्वीकृत भइसकेका छन्। आगामी दिनमा विधेयकको छलफल र पारित प्रक्रियाले बाँकी कर्मचारीको निर्णयमा कस्तो प्रभाव पार्छ भन्ने हेर्न बाँकी छ।
