कञ्चनपुरको शुक्लाफाँटा राष्ट्रिय निकुञ्जमा चाडपर्वको समयसँगै आन्तरिक र बाह्य पर्यटकको आगमन बढेको छ। निकुञ्जका रेञ्जर विक्रम चौधरीका अनुसार मुलुक चाडपर्वमय भइरहेका बेला निकुञ्ज घुम्न आउनेको सङ्ख्यामा उल्लेख्य वृद्धि देखिएको हो।
करिब ३०५ वर्गकिलोमिटर क्षेत्रफलमा फैलिएको यो निकुञ्ज विश्वमै सबैभन्दा ठूलो बाह्रसिङ्गाको बथान हेर्न पाइने ठाउँका रूपमा परिचित छ। सानो क्षेत्रफलमा धेरै पाटेबाघ पाइने निकुञ्जका रूपमा पनि यसको छुट्टै पहिचान छ। निकुञ्ज कार्यालयका अनुसार यहाँ दुई हजार तीन सयभन्दा बढी बाह्रसिङ्गा, ५० वटा पाटेबाघ, २० भन्दा बढी गैँडा र साढे चार सयभन्दा बढी प्रजातिका चराचुरुङ्गी पाइन्छन्।
गत असोज २८ गतेदेखि कात्तिक ९ गतेसम्मको १३ दिनमा आन्तरिक र बाह्य गरी ५९० जनाले निकुञ्जको अवलोकन भ्रमण गरेका छन्। तीमध्ये ५६० जना आन्तरिक, २३ जना सार्क मुलुकका र सात जना सार्कबाहेकका अन्य मुलुकका पर्यटक रहेको रेञ्जर चौधरीले बताए। बर्सातका बेला प्रवेश बन्द रहेको निकुञ्ज असोजको अन्तिम सातामात्रै खुला गरिएको थियो।
चाडपर्वका बेला घर फर्किएका कञ्चनपुरसहित सुदूरपश्चिमका र मुलुकका विभिन्न स्थानका मानिस निकुञ्ज घुम्न आउने क्रम बढेको छ। काम र अध्ययनका कारण जिल्लाबाहिर रहेका स्थानीय पनि बिदाका बेला शुक्लाफाँटा आउने गरेको चौधरीले बताए। निकुञ्ज प्रवेशका लागि आन्तरिक पर्यटकले प्रतिव्यक्ति १०० रुपैयाँ, सार्क राष्ट्रका पर्यटकले ७५० रुपैयाँ र सार्कबाहेकका विदेशी पर्यटकले एक हजार ५०० रुपैयाँ शुल्क तिर्नुपर्छ।
कञ्चनपुर उद्योग वाणिज्य सङ्घका अध्यक्ष दिनेश मल्लका अनुसार शुक्लाफाँटासहित महाकालीको चार लेनको पक्की पुल, झोलुङ्गे पुल, बेदकोट ताल र झिलमिला तालमा पनि आन्तरिक पर्यटकको चहलपहल बढेको छ। पश्चिमी नाका गड्डाचौकी भएर भारतको नैनीताल र कैँचीधाम घुम्न जाने नेपालीको सङ्ख्या पनि बढेको उनले बताए। पर्यटकीय स्थलमा यातायात, आवास र सुरक्षामा सरोकारवाला निकायले ध्यान दिनुपर्नेमा उनले जोड दिए।
