यस वर्षको तिहारमा देशभर फूलको ठूलो कारोबार हुने देखिएको छ। फ्लोरिकल्चर एसोसिएसन नेपालले सार्वजनिक गरेको अनुमानअनुसार पाँच दिने पर्वमा ५१ लाख ८० हजार वटा विभिन्न फूलका माला प्रयोग हुनेछन्। ती मालाबाट मात्र करिब ४८ करोड रुपैयाँ बराबरको कारोबार हुने प्रक्षेपण गरिएको छ।
मालासँगै फूलका थुँगा र गमला पनि जोड्दा यस वर्षको तिहारमा समग्र पुष्प कारोबार ६४ करोड ५० लाख रुपैयाँ पुग्ने अनुमान छ। सबैभन्दा धेरै सयपत्रीका ४५ लाख माला खपत हुनेछन्। औसत ९० रुपैयाँका दरले त्यसबाट ४० करोड ५० लाख रुपैयाँको कारोबार हुनेछ। मखमलीका ६ लाख माला, गोदावरीका २० हजार माला र विभिन्न फूल मिसाइएका ६० हजार मालाबाट पनि उल्लेख्य रकमको कारोबार हुने देखिएको छ।
मालाबाहेक सयपत्रीका ३५ लाख थुँगा र गोदावरीका आठ लाख गमलाको कारोबार पनि यसै अवधिमा हुनेछ। पछिल्ला वर्षहरूमा सयपत्रीको व्यावसायिक खेती उल्लेख्य रूपमा विस्तार भएको छ। अहिले सातै प्रदेशका विभिन्न जिल्लामा दुई सय २५ हेक्टरभन्दा बढी क्षेत्रफलमा सयपत्रीको व्यावसायिक उत्पादन भइरहेको छ। यसले कृषकको आम्दानी बढाउन र आयात घटाउन सहयोग पुगेको एसोसिएसनको भनाइ छ।
सयपत्रीमा केही आयात गर्नुपर्ने अवस्था रहे पनि मखमलीमा भने देश आत्मनिर्भर बनेको एसोसिएसनका अध्यक्ष राजेशभक्त श्रेष्ठले बताएका छन्। यस वर्ष मखमलीका ६ लाख मालाको माग रहेकामा चार लाख आन्तरिक बजारमा खपत हुने र करिब दुई लाख माला विदेश पठाइने अनुमान छ। गत ९ देखि ११ असोजसम्मको वर्षा र बाढीपहिरोले सयपत्री खेतीमा क्षति पुगेकाले करिब ११ दशमलव ११ प्रतिशत माला आयात गर्नुपर्ने अवस्था रहेको एसोसिएसनले जनाएको छ। एसोसिएसनले स्वदेशी फूल प्रयोगलाई प्राथमिकता दिन उपभोक्ता र व्यापारीलाई आग्रह गरेको छ।
