बंगालको खाडीमा बनेको चक्रवात झन् बलियो हुँदै गएको छ। यसको प्रभावले धनकुटासहित कोशी प्रदेशका विभिन्न जिल्लामा ठूलो पानी र तेज हावाहुरी आउन सक्ने देखिएपछि धनकुटाको जिल्ला प्रशासन कार्यालयले सर्वसाधारणलाई विशेष सावधानी अपनाउन भनेको छ।
प्रशासनले सार्वजनिक गरेको सूचनामा कात्तिक १२ देखि १४ गतेसम्म चट्याङसहितको भारी वर्षा र हावाहुरीको सम्भावना उल्लेख छ। राष्ट्रिय विपद् जोखिम न्यूनीकरण तथा व्यवस्थापन प्राधिकरण र जल तथा मौसम विज्ञान विभागले जारी गरेको विशेष बुलेटिनका आधारमा यो आग्रह गरिएको प्रशासकीय अधिकृत रामजी पौडेलले बताएका छन्।
लगातारको वर्षाले बाढी आउने, पहिरो खस्ने र तल्लो क्षेत्र डुबानमा पर्ने खतरा बढ्न सक्ने प्रशासनको भनाइ छ। यस्तो अवस्थामा मानिसको ज्यान र सम्पत्तिमा क्षति पुग्न सक्ने भएकाले जोखिम घटाउन सबैले आवश्यक सावधानी अपनाउनुपर्ने उनले बताए।
प्रशासनले कात्तिक १२ गते बिहीबारदेखि धान काट्ने र भित्र्याउने कामसहितका कृषि गतिविधि नगर्न आग्रह गरेको छ। अग्ला पहाडी र हिमाली क्षेत्रमा पर्यटक नजान, जोखिम भएका ठाउँमा रहेका पर्यटकलाई सुरक्षित स्थानमा रहन र भारी वर्षाका कारण सडक तथा हवाई यात्रा प्रभावित हुन सक्ने भएकाले अत्यावश्यक कामबाहेक यात्रा नगर्न पनि भनिएको छ। वर्षा भइरहेका बेला जोखिमयुक्त स्थानमा सवारी नचलाउन र अवस्था हेरेर मात्र यातायात सञ्चालन गर्न प्रशासनले अनुरोध गरेको छ।
स्थानीय तह, सुरक्षा निकाय, स्वयंसेवक र सरोकारवाला निकायलाई सर्वसाधारणलाई जोखिमबारे जानकारी दिन र विपद् प्रतिकार्यका लागि तयार रहन निर्देशन दिइएको छ। पूर्वसूचना जारी भएका जोखिमयुक्त बस्तीका बासिन्दालाई सुरक्षित स्थानमा सार्न पनि आग्रह गरिएको छ। सम्बन्धित निकायबाट आउने नयाँ पूर्वानुमान र चेतावनी पालना गर्न र विपद्को घटना भएमा तत्काल सम्बन्धित निकायमा खबर गर्न प्रशासनले अनुरोध गरेको छ।
