विजयादशमीको अवधिमा बागमती प्रदेशका १० जिल्लामा १२५ वटा सवारी दुर्घटना भएका छन्। ती दुर्घटनामा १५ जनाले ज्यान गुमाएका छन् भने २९३ जना घाइते भएका छन्। नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय, रामनगरका प्रहरी नायब उपरीक्षक गङ्गाबहादुर सारुले असोज २५ गतेदेखि कात्तिक ८ गतेसम्मको तथ्याङ्क सार्वजनिक गर्दै यो जानकारी दिएका हुन्।
गत वर्षको सोही अवधिसँग तुलना गर्दा यस वर्ष दुर्घटनाको सङ्ख्या केही घटेको देखिन्छ। गत वर्ष सोही अवधिमा १३५ वटा दुर्घटना भएका थिए। ती दुर्घटनामा पाँच जनाको मृत्यु भएको थियो भने ३३२ जना घाइते भएका थिए। यस वर्ष दुर्घटना घटे पनि मृत्यु हुनेको सङ्ख्या भने बढेको छ।
यस वर्षको चाडपर्वका बेला सिन्धुलीमा भएको सुमो दुर्घटनामा ठूलो क्षति पुगेको थियो। उक्त दुर्घटनामा परेका तीन जना अझै बेपत्ता छन्। प्रदेशभर यस वर्ष सबैभन्दा बढी दुर्घटना काभ्रेपलान्चोकमा भएको सारुले बताए।
दुर्घटनामध्ये ९८ वटा मोटरसाइकलसँग सम्बन्धित छन्। ती दुर्घटनामा आठ जनाको ज्यान गएको छ। मोटरसाइकलका कारण हुने दुर्घटनाको जोखिम बढ्दै गएको भन्दै उनले सडकमा थप सतर्कता अपनाउन आग्रह गरे।
