भारी वर्षा, बाढी, पहिरो र डुबानको सम्भावित जोखिमलाई ध्यानमा राख्दै देशभरका स्वास्थ्य सेवालाई तयारी अवस्थामा राख्न निर्देशन दिइएको छ। मौसम पूर्वानुमानपछि स्वास्थ्य आपतकालीन तथा विपद् व्यवस्थापन इकाइले सातै प्रदेशका स्वास्थ्य आपतकालीन कार्यसञ्चालन केन्द्रलाई पत्र पठाएर आवश्यक तयारी गर्न भनेको हो।
नेपाल मौसम विज्ञान विभागले कात्तिक १२ देखि १४ गतेसम्म चट्याङ र हावाहुरीसहित मध्यमदेखि भारी वर्षा तथा हिमपात हुन सक्ने बताएको छ। यही पूर्वानुमानलाई आधार मानेर स्वास्थ्य क्षेत्रमा सतर्कता बढाइएको हो।
इकाइका प्रमुख डा. हेमन्त चन्द्र ओझाले पठाएको पत्रमा प्रत्येक प्रदेशमा चौबिसै घण्टा सम्पर्कमा रहने एक जना आपतकालीन सम्पर्क व्यक्ति तोक्न भनिएको छ। ती व्यक्तिको सम्पर्क विवरण इकाइमा पठाउन र सार्वजनिक गर्न पनि निर्देशन दिइएको छ।
हब तथा स्याटेलाइट अस्पताल सञ्जालसँग समन्वय गरेर आकस्मिक चिकित्सकीय टोलीसहित आवश्यक स्वास्थ्यकर्मीलाई तयारी अवस्थामा राख्न भनिएको छ। स्वास्थ्य क्षेत्रका साझेदार निकायसँग मिलेर जनशक्ति, औषधि, स्वास्थ्य सामग्री, उपकरण, एम्बुलेन्स र अन्य स्रोतसाधनको विवरण अद्यावधिक गर्न पनि भनिएको छ।
प्रदेशमा रहेका एम्बुलेन्स प्रेषण केन्द्रसँग निरन्तर समन्वय गरी घाइते र प्रभावित नागरिकलाई समयमै सेवा पुर्याउन एम्बुलेन्स परिचालन सहज, छिटो र प्रभावकारी बनाउनुपर्ने पत्रमा उल्लेख छ। स्वास्थ्यसम्बन्धी घटना र अवस्थाको विवरण हरेक दिन जिरो रिपोर्टिङ वा इन्सिडेन्ट रिपोर्टिङमार्फत पठाउन पनि सबै प्रदेशलाई आग्रह गरिएको छ।
