चक्रवात ‘अनर्व’ को सम्भावित प्रभावका कारण कात्तिक ११ देखि १५ गतेसम्म नेपालका प्रमुख नदी तथा जलाधार क्षेत्रमा वर्षा भई नदीको जलसतह बढ्न सक्ने पूर्वानुमान गरिएको छ। जलविज्ञान तथा जलस्रोत अनुसन्धान केन्द्रको बाढी पूर्वानुमान महाशाखाले बुधबार सार्वजनिक गरेको बाढी तथा अन्य जलजन्य जोखिम आकलनमा नारायणी, बागमती, कमला, कन्काई र कोशी नदीका जलाधार तथा आसपासका क्षेत्रमा वर्षा हुन सक्ने उल्लेख छ।
महाशाखाका अनुसार बुधबार देशभरका प्रमुख नदीमा जलसतह सामान्य अवस्थामा रहनेछ। कात्तिक १२ गते नारायणी, कोशी, बागमती, कमला र कन्काईलगायत नदी तथा जलाधारमा जलसतह सामान्य रूपमा बढ्न सक्ने र बाढीको जोखिम न्यून रहने अनुमान छ।
कात्तिक १३ गते कोशी र नारायणी नदीका साथै बागमती, कमला र कन्काई तथा आसपासका जलाधारमा मध्यमदेखि भारी वर्षा हुन सक्ने पूर्वानुमान छ। यसका कारण नदीको जलसतह उल्लेख्य रूपमा बढ्न सक्ने भए पनि महाकाली, कर्णाली, पश्चिम राप्ती र बबई तथा तिनका शाखा नदीमा जलसतह सामान्य मात्र बढ्ने अनुमान गरिएको छ। उक्त दिन बाढीको जोखिम मध्यम रहने महाशाखाले जनाएको छ।
कात्तिक १४ गते कोशी, बागमती, कमला र कन्काई तथा आसपासका जलाधारमा हल्कादेखि मध्यम वर्षा हुन सक्नेछ। अघिल्ला तीन दिनको वर्षाका कारण प्रमुख नदीमा जलसतह उच्चतम् बिन्दुमा पुग्न सक्ने भए पनि सतर्कता तह पार गर्ने सम्भावना न्यून रहेको आकलन गरिएको छ। उक्त दिन पनि बाढीको जोखिम मध्यम रहनेछ।
कात्तिक १५ गते कोशी, बागमती र नारायणी नदीका जलाधारका केही स्थानमा हल्का वर्षा हुन सक्ने र बाढीको जोखिम न्यून रहने पूर्वानुमान गरिएको छ। महाशाखाले नदीको जलसतहमा हुन सक्ने परिवर्तनलाई ध्यानमा राख्दै सम्बन्धित क्षेत्रका बासिन्दालाई सतर्क रहन आग्रह गरेको छ।
