लुम्बिनी प्रदेशको पहिचान बन्दै गएको केबलकार सेवामा छिमेकी मुलुकबाट आउने यात्रुको उपस्थिति उल्लेख्य रूपमा बढेको छ। आर्थिक वर्ष २०८२/८३ मा अघिल्लो वर्षको तुलनामा भारतीय यात्रुको संख्या २४ प्रतिशतले बढेको कम्पनीले जनाएको छ। केबलकार चढ्ने सबै यात्रुमध्ये भारतीय यात्रुको हिस्सा २९ प्रतिशत पुगेको छ।

मंगलबार सम्पन्न कम्पनीको २३औँ वार्षिक साधारणसभामा सञ्चालक समितिको वार्षिक प्रतिवेदन प्रस्तुत गर्दै अध्यक्ष चन्द्रप्रसाद ढकालले यी तथ्यांक सार्वजनिक गरेका हुन्। उनका अनुसार उत्तर प्रदेशसँगै दिल्ली, झारखण्ड, बिहार, केरला र आन्ध्र प्रदेशबाट आउने यात्रु बढेका छन्। ती यात्रु पाल्पाको वसन्तपुर डाँडामा रहेको कामाख्या देवी र पुरानो दुर्गा मन्दिरको दर्शन तथा अवलोकनका लागि केबलकार प्रयोग गर्छन्।

भारतीय यात्रु आकर्षित गर्न सीमा क्षेत्रका सवारी चालकका लागि छुट्टै व्यवस्था गरिएको र भारतीय भ्लगरमार्फत प्रचारलाई तीव्र पारिएको प्रतिवेदनमा उल्लेख छ। बुटवल र भैरहवा क्षेत्रका ७० भन्दा बढी होटल, ४० भन्दा बढी संघसंस्था र ४५ भन्दा बढी शिक्षण संस्थासँग सहकार्य तथा टिकट छुटसम्बन्धी सम्झौता भएका छन्। भाटभटेनी सुपरमार्केट, क्युएफएक्स सिनेमा, लुम्बिनी विकास कोष र शंकरनगर वन विहार पनि यस सहकार्यमा जोडिएका छन्।

वसन्तपुरस्थित माथिल्लो स्टेसनमा क्यासिनोसहितको पाँचतारे होटल बनाउने काम अघि बढाइएको छ। होटलको नक्सापास अन्तिम चरणमा पुगेको छ भने पिउने पानीको प्रबन्ध आंशिक रूपमा पूरा भएको छ। आगामी आर्थिक वर्षमा रोलर कोस्टर, बाउन्स क्यासल र जिरो ग्राभिटी राइडजस्ता मनोरञ्जन संरचना थप्ने योजना छ। विश्वव्यापी भूराजनीति र मूल्यवृद्धिका बाबजुद कम्पनीले खर्च नियन्त्रण र मितव्ययिता कायम राख्दै भविष्यका केबलकार आयोजनाका लागि चाहिने दक्ष प्राविधिक जनशक्ति तयार गर्न पनि योगदान गरिरहेको जनाइएको छ।